Sosial

Mütəxəssisdən SƏRT XƏBƏRDARLIQ! - “Mafiya və cinayətkar qrup tərəfindən idarə olunur...”

1 Avqust 2022 12:30

Sonuncu xəbərdarlıqdan sonra dəhşətli mesajlar alıram. İnsanlar 3-5 min manat vəsaiti elan saytlarında itiriblər. Son 3 zərərçəkənin itirdiyi məbləğin cəmi 12 min manatdan çoxdur. Ölkə xaricindən edilən bu dələduzluq böyük bir mafiya və cinayətkar qruplaşma tərəfindən idarə olunur. Çox təəssüflə bildirirəm ki, itən pulları 99 faiz hallarda geri qaytarmaq mümkün deyil.

Publika.az xəbər verir ki, bu sözləri texno-bloger Fərid Pərdəşünas feysbukda yazıb. Mütəxəssis bu cür kiber hücumların qurbanı olmamağın yollarını izah edib.

“Bu və ya digər kiber hücum növü ilə rastlaşmısınızsa, mütləq mənə bildirin. Elan saytlarında kiber hücum qurbanı olmamaq üçün 4 qayda var:

- Görmədiyiniz adama məhsul satmayın.

- WhatsApp və zəng ilə sizinlə əlaqəyə keçənlərə kart məlumatlarızı verməyin.

- Alıcıya şəxsiyyət vəsiqənizi göndərməyin.

- 3D təhlükəsizlik kodunu qardaşınız da olsa, göstərməyin. Bu kod yalnız və yalnız kart sahibi üçün olur”.

Aytən Məftun