Sülh, yoxsa müharibə seçimi bu tarixdə olacaq - Politoloq açıqladı

“Vasitəçilər bu ilin sonuna kimi Azərbaycan və Ermənistan arasında sülh müqaviləsinin imzalanması üçün çalışır. Sözügedən prosesin icra olunmasında olduqca vacib şərtlər var”.

Bu sözləri Publika.az-a açıqlamasında politoloq Yeganə Hacıyeva bildirib.

O, hesab edir ki, sülh müqaviləsi imzalanmadığı təqdirdə üçtərəfli razılaşmalar da sual altına düşə bilər.

“Şərtlərin zəruriliyinə əməl olunmaması, şərtlərin dəyişilməsi müharibənin yenidən başlanması deməkdir. Üçtərəfli razılaşmanın icra olunmuş bəndləri ilə hələ də icra olunmayan bəndləri arasında mübahisəli vəziyyət yaranır. Bu situasiya rus sülhməramlılarının bölgədə qalmasını da sual altına salır”, - deyə politoloq vurğulayıb.

Y.Hacıyevanın sözlərinə görə, ilin sonuna kimi gözləməliyik: “Rusiya da, Ermənistan da, fürsətdən istifadə edib ümumi yanaşmaları dəyişmək istəyən bəzi tərəflər də bunu anlayır. Ölkəmiz və Ermənistan arasında sülhün tam bərpa olma istəyi yalnız Azərbaycanın deyil, Avropa Birliyinin və ABŞ-ın da ortaq istəyidir”.

Ayşən Rəhim