Bulvarda Yeni illə bağlı hansı YENİLİKLƏR olacaq?

Dənizkənarı Milli Parkda Yeni illə bağlı xüsusi hazırlıq işləri aparılır.

Publika.az xəbər verir ki, bu barədə Report-a Dənizkənarı Bulvar İdarəsinin mətbuat xidmətinin rəhbəri Əfsanə Mehdiyeva deyib.

"Bu il də Dənizkənarı Bulvar İdarəsi olaraq çalışmışıq ki, bayram əhval-ruhiyyəsini daha yaxşı çatdırmaq, qonaqlarımızın zövqünü oxşamaq üçün Yeni il hazırlıqlarını daha geniş miqyasda, yeni və fərqli tərtibatda təqdim edək", - Ə.Mehdiyeva bildirib.

Bulvar rəsmisi qeyd edib ki, Milli Parkın əksər hissəsi, xüsusilə də ziyarətçi axınının sıx olduğu istiqamətlərin hər yeri bayram dekorasiyaları, Yeni il instalyasiyaları ilə bəzədilib:

"Demək olar ki, hər addımbaşı xüsusi işıqlarla bəzədilmiş yolkaları görmək mümkündür. Bildiyiniz kimi, şəhərimizin ən hündür və gözəl Yeni il yolkalarından ikisi məhz bulvar ərazisində bəzədilir. Onların hündürlüyü təqribən 20 metrə yaxındır".

Ə.Mehdiyeva qeyd edib ki, bulvarın giriş hissələrində xüsusi tərtibatla işıq dekorasiyaları var. Bununla yanaşı, Kukla Teatrının yaxınlığındakı hissədə Yeni il yarmarkasının fəaliyyəti nəzərdə tutulub.