"Mədəniyyət və hüquq” mövzusunda forum panel müzakirələrlə işini davam etdirir

Mədəniyyət Nazirliyinin təşkilatçılığı ilə Heydər Əliyev Mərkəzində işə başlayan "Mədəniyyət və hüquq: müasir çağırışlar” mövzusunda forum açılış mərasimindən sonra panel müzakirələrlə işini davam etdirir.

Publika.az xəbər verir ki, "Mədəniyyət və hüquq" mövzusunda ilk panel Vəkillər Kollegiyası Biznes hüququ komitəsinin sədri Nazlı Əhmədovanın moderatorluğu ilə gerçəkləşib. Paneldə "Mədəniyyət: milli və qlobal baxış", "Azərbaycan dili və digər mədəniyyət dəyərləri" və "Dövlət və hüquq mədəniyyət hadisəsi kimi" mövzuları üzrə müzakirələr aparılıb.

Milli Məclisin sədr müavini Ziyafət Əsgərov, Hüquq siyasəti və dövlət quruculuğu komitəsinin sədri Əli Hüseynli, Azərbaycanda Atatürk Mərkəzinin direktoru akademik Nizami Cəfərov, musiqişünas, sənətşünaslıq üzrə fəlsəfə doktoru Nigar Axundova, millət vəkili Erkin Qədirli, “Simurq” Azərbaycan Mədəniyyət Assosiasiyasının prezidenti kulturoloq Fuad Məmmədov, ADA Universiteti Hüquq fakültəsinin dekan müavini Cavid Qədirov və hüquqşünas, tədqiqatçı Emil Məcidov mövzu üzrə fikirlərini bölüşüblər. Çıxışlarda ictimai fikirdə mədəniyyət və hüquq anlayışlarına münasibət, yaradıcı məhsul və hüquqi tənzimləmələr, eləcə də bu sahədə beynəlxalq təcrübə kimi məsələlərə toxunulub. Sonda auditoriyanı maraqlandıran suallar cavablandırılıb, təkliflər səsləndirilib.