Əli Əsədov qərar imzaladı

Azərbaycan Respublikasının Nazirlər Kabineti “Azərbaycan Respublikası Dövlət Mühafizə Xidmətinin fəaliyyətinin təmin edilməsi ilə bağlı tədbirlər haqqında” Prezident fərmanının icrası məqsədilə yeni qərar qəbul edib.

Publika.az xəbər verir ki, bu barədə Baş nazir Əli Əsədov qərar imzalayıb.

Qərara əsasən, bir sıra normativ hüquqi aktlarda dəyişikliklər edilib. Belə ki, icra hakimiyyəti orqanlarının yerləşdiyi binaların ətrafında 200 metr radiusda kütləvi tədbirlərin keçirilməsinə dair qaydaları müəyyən edən sənəddə düzəliş aparılıb. Dəyişikliyə əsasən, “Prezidentinin Təhlükəsizlik” ifadəsi “Dövlət Mühafizə” ifadəsi ilə əvəz olunub.

Bundan əlavə, əmək pensiyalarının təyin edilməsi və ödənilməsi qaydaları, dövlət icbari şəxsi sığorta ödənişlərinin verilməsi, həmçinin sığorta haqlarının hesablanması və uçotu ilə bağlı digər normativ sənədlərdə də analoji dəyişikliklər həyata keçirilib.

Qərarla həmçinin “Hərbi Ovçuluq İttifaqı” Məhdud Məsuliyyətli Cəmiyyətinin nizamnaməsi və strukturunun təsdiqinə dair 2014-cü il tarixli sənəd ləğv edilib.