Gürcüstan separatçı qurumları tanıyır? – ŞOK İDDİA

Gürcüstan Rusiya ilə gömrük və yüklərin tranziti haqqında razılaşma çərçivəsində Abxaziya və Cənubi Osetiyayla sərhədlərdə gömrük nəzarəti məntəqələrini açmağa hazırdır.

Publika.az xəbər verir ki, bu haqda Rusiya hökumətindəki mənbə “Kommersant” nəşrinə bildirib.

“Faktiki olaraq, razılaşma üzrə öhdəliklər Gürcüstanı sərbəst gömrük əraziləri kimi Abxaziya və Cənubi Osetiyanı tanımağa məcbur edir”, - nəşrin həmsöhbəti deyib.

Gürcüstan və Rusiya arasındakı razılaşma üç ticarət dəhlizinin yaradılmasını nəzərdə tutur. Onlardan ikisi Abxaziya və Cənubi Osetiyadan keçəcək. Sənəd yalnız mal axınının monitorinqi üzrə öhdəlikləri tənzimləyir, dəhlizlərin avtomatik açılmasını nəzərdə tutmur.

İsveçrənin “Societe Generale de Surveillance” (SGS) şirkəti yüklərin axınının monitorinqi və onların damğalanması ilə məşğul olacaq.

Qeyd edək ki, Gürcüstandan birtərəfli qaydada ayrılan Abxaziya və Cənubi Osetiyanın tanınması haqqında fərman 2008-ci il avqust müharibəsindən sonra Rusiya prezidenti Dmitri Medvedev tərəfindən imzalanıb. Cənubi Osetiyanın müstəqilliyi Suriya, Nikaraqua, Venesuela və Nauru tanıyıb. Abxaziya bu dörd ölkədən başqa, Vanuatu da tanıyıb.

Gürcüstanda Cənubi Osetiya və Abxaziya Rusiya tərəfindən işğal edilmiş ərazi hesab edilir.

Ömər Dağlı