Artur Qazinyan mandatdan imtina etdi

Ermənistan parlamentində revanşistləri təmsil edən “Ermənistan alyansı” blokunun deputatı Artur Qazinyan bu gün deputatlıqda istefa verdiyini açıqlayıb.

Publika.az xəbər verir ki, o, bununla bağlı açıqlamasında deyib:

“Mən deputat mandatımdan imtina etmək qərarına gəldim. Bunu hazırkı şəraitdə ən düzgün və əsaslandırılmış qərar hesab edirəm. Səbəblər haqqında indi danışmaq istəmirəm, onlar müstəsna olaraq siyasi və taktiki xarakter daşıyır”.

Artur Qazinyan əlavə edib ki, “Müqavimət” hərəkatının reallaşdırılmamış böyük potensialı var. O, hərəkatı Azərbaycana güzəştlərin qarşısını ala biləcək yeganə mövcud platforma adlandırıb və hər kəsi hərəkatın təşkil etdiyi etiraz aksiyalarında iştirak etməyə çağırıb.

Ermənistan parlamentindəki radikal-revanşist kəsimi təmsil edən “Ermənistan alyansı”nın başçısı Azərbaycana qarşı işğalçı müharibənin ən qanlı icraçılarından olan Robert Köçəryandır. Alyans iki partiyadan – “Daşnaksütyun” və “Dirçələn Ermənistan”dan ibarətdir və 2021-ci il mayın 9-da Ermənistan parlamentinə keçirilən növbədənkənar seçkilər ərəfəsində yaradılıb. 29 deputat yerinə malik olan blokun parlamentdəki başçısı keçmiş müdafiə naziri, Xocalı soyqırımının bilavasitə iştirakçısı Seyran Ohanyandır.

Səxavət