Cinayət tarixçəsi
“Gecə uzunboğaz çəkmə geyib evdən çıxdım” - Bir cinayətin tarixçəsi
Cinayəti gizlətmək məqsədi...
Şahin özü ilə götürdüyü süngü bıçağı və xəncərlə hər iki qadını
xüsusi amansızlıqla qətlə yetirib. Evdən 2956,4 manat pul, 140
manat dəyərində qızıl boyunbağı, 210 manatlıq qızıl sırğa, 4500
manatlıq brilyant qaşlı sırğa, 1100 manatlıq qızıl saat bilərziyi,
1450 manatlıq qızıl beşlik, 930 manatlıq firuzə qaşlı qızıl aypara
kulon, 4750 manatlıq almaz qaşları olan qızıl üzük və 1970 manatlıq
mina və mirvari ilə bəzənmiş qızıl "zəng" sırğa, cəmi 18006,4 manat
dəyərində külli miqdarda əmlakı ələ keçirib.
Törətdiyi cinayətləri gizlətmək məqsədi ilə dekabrın 22-də gecə
saat 2:30 radələrində həmin ünvana gəlib. Qadınların qaz
partlayışından ölməsi versiyasını yaratmaq məqsədi ilə mənzildə və
aynabənddə olan qaz sobalarının vintillərini açaraq təbii qazı evə
buraxıb. Əvvəlcədən özü ilə gətirdiyi 1 litrlik plastmas qabda olan
benzini otaqlara və aynabəndə səpərək alışqanla yandırıb.
"Məhəbbətə həsr olunmuş mesajlar var idi..."
Şahin Hüseynov istintaqa ifadəsində göstərib ki, qətlə yetirdiyi
Qətibə Məmmədquliyeva bibisi qızı, Leyla Əcanova isə bibisi
nəvəsidir: "Leyla Nərimanov metrostansiyasının yaxınlığında
yerləşən kompüter kollecində 2-ci kursda oxuyurdu. Kollecə daxil
olması münasibəti ilə Qətibə Leylaya "Siemens" markalı mobil
telefon almışdı.
Keçən il iyunun 1-də Leyla həyətyanı sahədə işləyən vaxtı mən çay
içmək üçün evə girdim. Leylaya məxsus mobil telefon stolun üstündə
idi. Maraq üçün telefonun menyüsünə daxil olub mesajları oxudum.
Müxtəlif vaxtlarda və eyni mənbədən məhəbbətə həsr olunmuş mesajlar
var idi. Bunu Leylaya irad tutdum, bu barədə bibim qızı Qətibəyə də
bildirdim. Qətibə Leylanı danlayaraq ona iki şillə ilişdirdi.
"Qız mənimdir, özüm bilərəm"
Həmin ilin oktyabr ayında Qətibəgildə olarkən yenə də Leylanın
mobil telefonu əlimə keçdi. Bu dəfə də daxil olan zənglərin
siyahısına baxarkən tanış olmayan nömrələr gördüm və bu barədə
Qətibəyə xəbər verdim.
Qətibənin cavabı belə oldu: "Qız mənimdir, özüm bilərəm, get işinlə
məşğul ol". Leylaya gələn mesajları onun pozğun yola düşməsi kimi
yozdum. Bir az götür-qoydan sonra nəslimin adına ləkə gətirdikləri
üçün onları öldürmək qərarına gəldim.
"Görmürsən, öldürməyə gəlib?"
Dekabrın 21-dən 22-nə keçən gecə evdə hamı yuxuya gedəndən sonra
mərhum atama məxsus xəncər, süngü bıçağı və uzunboğaz hərbi çəkməni
götürüb gizlicə evdən çıxdım və Qətibəgilə gəldim. Qətibəgilin
evlərinə az qalmış ayaqqabılarımı çıxarıb evlərin arasında
gizlətdim və uzunboğaz çəkmələri geyindim. Sonra evin aşağı
hissəsində yerləşən ayaqyolunun üstünə çıxaraq həyətə düşdüm.
Evin giriş qapısına yaxınlaşıb ətrafa nəzər salaraq qapıya iki dəfə
təpik vurdum, qapı açıldı, içəri daxil oldum. Qətibə adətən zalda
taxtın üstündə yatırdı. Ancaq zala nəzər salsam da, onu orada
görmədim və dərhal yan otağa keçdim.
Qətibə çarpayıda üzüqoylu uzanmışdı, məndən gəlişimin səbəbini
soruşdu. Cəld hərəkətlə Qətibəyə yaxınlaşıb dizimi onun kürəyinə
qoydum ki, ayağa qalxa bilməsin. Bıçaq və xəncərlə Qətibənin
bədəninin müxtəlif yerlərinə zərbələr vurdum. Leyla onun yanında
yatmışdı. O, səsə ayılanda Qətibə "qaç, Leyla!" qışqırdı.
Leyla isə ondan niyə qışqırdığını soruşdu. Qətibə qızına:
"Görmürsən, öldürməyə gəlib?!" dedi. Leyla çarpayıdan qalxmaq
istəyəndə imkan vermədim. Bir dizimi Leylanın üstünə qoyub xəncərlə
bədəninin müxtəlif yerlərinə zərbələr vurdum. Başım Leylanı vurmağa
qarışdığından Qətibə əlimdən çıxaraq çarpayıdan üzü üstə döşəməyə
yıxıldı, mən onun durub qaçacağını fikirləşdiyimdən xəncərlə
kürəyinə daha bir neçə zərbə vurdum.
Bədəninin titrəməsindən və xırıltılı səslər çıxarmasından başa
düşdüm ki, canı çıxıb. Üzüqoylu vəziyyətdə uzanmış Leylaya da bir
neçə zərbə vurdum, bıçağı ürəyinə sancmaq istəsəm də, üzüqoylu
uzandığından bunu edə bilmədim. Ağzından qan gəldiyini görəndə başa
düşdüm ki, o da ölüb.
Sonra bıçağı, xəncəri qınlarına qoyaraq özümlə götürdüm, axtarıb
evin açarlarını və çöl qapısının kilidini tapdım. Evin qapısını
örtdüm, ancaq açarla bağlamadım. Həyət qapısından çıxdım, evdə heç
kimin olmaması fikrini yaratmaq uçun qapını kilidlə bağlayıb,
açarları qarajın üstünə tulladım, sonra ayağımdakı uzunboğaz
çəkmələri çıxardım, ayaqqabılarımı gizlətdiyim yerdən çıxarıb
geyindim, xəncəri, bıçağı, çəkməni, əlcəyi yolun kənarında olan
kanalın müxtəlif yerlərinə tullayıb evə getdim.
Əynimdə olan hərbi gödəkcə qana batdığı üçün çıxarıb evin həyətində
torpağın üstündə yandırdım, külünü isə həyətdəki açıq
kanalizasiyaya tulladım. Həyətdə oturub bir qədər fikirləşdim və
cinayətin izini itirmək üçün bibim qızının evini yandırıb
partlatmaq qərarına gəldim.
Dekabrın 21-dən 22-nə keçən gecə, saat 2:00 radələrində evdə hamı
yatandan sonra bir litrlik su qablarında benzin götürüb Qətibəgilin
evinə gəldim. Qarajın üstünə qalxıb, ora tulladığım açarları
götürdüm. Evə girib meyitləri qoyub getdiyim kimi aşkar etdim və
benzini otaqda olan yorğan-döşək yükünün, paltarların üstünə, otağa
açılan qapının kandarına səpdim, qaz peçinin vintilini açdım,
qapının kandarından benzini alışqanla yandırdım.
Evdən çıxanda qapını örtdüm. Sonra hasardan çölə tullanıb Qətibə və
Leylanın evdə olmaları fikrini yaratmaq üçün qıfılı açdım, bir
litrlik su butulkasını, qıfılı açarla birlikdə zibilxanaya tullayıb
evə getdim. Qətibənin evindən pul və qızıl əşyaları
götürməmişəm".
"Evin yandığını dedilər"
Zərərçəkmişlərin hüquqi varisi qismində dindirilən Ruqiyyə Əhmədova
ifadəsində göstərib ki, Qətibə onun bacısı, Leyla bacısı qızı,
təqsirləndirilən şəxs Şahin Hüseynov isə dayısı oğludur: "Dayım
arvadı Səbirə bir yerə gedəndə uşaqları bizim evdə qoyub gedərdi.
Buna görə də Səbirənin oğlu Şahin ailəmizin üzvü kimi evin bütün
sirlərini bilirdi.
Dekabrın 22-də səhərə yaxın evimizə zəng vurub bacımın evinin
yanması barədə xəbər verdilər. Dərhal Putaya getdim, bacımın
həyətində çoxlu adam yığışmışdı. Dayım arvadı Səbirəylə oğlu Şahin
də oradaydılar. Yanğınsöndürənlər evi söndürdükdən sonra Qətibəylə
qızı Leylanın meyitini evdən aşkar etdilər.
"Ən ağır cəza verilməsini xahiş edirəm"
Sonradan məlum oldu ki, onların hər ikisini Şahin qətlə yetirib.
Yanğından sonra mənə məlum oldu ki, Qətibəyə məxsus qızıl
boyunbağı, qırmızıqaş qızıl sırğa, brilyant qaşlı platin sırğa, 850
ABŞ dollar dəyərində təkqaş brilyant üzük, qızıl saat bilərziyi,
qızıl beşlik, aypara formalı firuzə qaşlı klon, almaz qaşları olan
platin üzük, mirvari ilə işlənmiş, çox qədimi olan "zəng" sırğa
yoxa çıxıb. Bacım öz qızı üçün cehiz almaq məqsədilə pul yığırdı və
ölən günədək evində 3500 dollar varıydı. Həmin pul da üzə
çıxmadı.
İstintaq vaxtı bildik ki, qızılları və pulları Şahin götürüb. Şahin
Qətibənin ev işlərinə kömək etmək üçün demək olar ki, hər gün onun
evinə gedib-gəlirdi. O, çox yaxşı bilirdi ki, Leyla namuslu qızdır
və anası Leylanın tərbiyəsi ilə ciddi məşğul olur. Şahin öz əməlinə
haqq qazandırmaq üçün mərhumlara şər atır. Mən məhkəmədən Şahinə ən
ağır cəza verilməsini xahiş edirəm".
"Şahin həmişə Qətibəyə yardım edib"
Şahid qismində dindirilən Səbirə Hüseynova (təqsirləndirilən şəxsin
anası) ifadəsində göstərib ki, Qətibəylə və sonuncunun qızıyla
münasibəti normal olub. Qətibə şəkər və zob xəstəliklərindən
əziyyət çəkdiyi üçün xasiyyətcə çılğın və əsəbi qadın olub: "Şahin
məişət qayğıları ilə bağlı həmişə Qətibəyə yardım edib. Baş verən
hadisəyədək Qətibə və qızı Leyla Şahindən, Şahin isə onlardan
şikayətçi olmayıb.
Dekabrın 22-də səhərə yaxın Qətibənin qonşusu mənə zəng etdi,
Qətibənin evində yanğın baş verdiyini dedi. Mən Şahini yuxudan
oyatdım və biz birlikdə Qətibənin evinə gəldik. Az sonra Qətibəylə
Leylanın külə dönmüş cəsədlərini otaqların birindən tapıb
çıxartdılar. Hadisənin qəsdən, yaxud təsadüfdən baş verməsi barədə
məlumatım yoxdur".
Bu cinayət işi üzrə araşdırma Bakı Ağır Cinayətlər Məhkəməsində
aparılıb. İşə baxan hakimlər Şahin Hüseynovun ömürlük azadlıqdan
məhrum edilməsi ilə bağlı cəza təyin ediblər.
Hacı Zeynalov
Publika.Az
-
Sosial20:20
Şahmar Hüseynova yeni vəzifə verildi - FOTO
-
Maraq dünyası20:12
"Tarqovı"da çiy ətdən libas geyinən qızdan QƏRİBƏ HƏRƏKƏTLƏR - VİDEO
-
Art19:36
Azərbaycan və Türkiyə birgə film çəkəcəklər - ADI AÇIQLANDI
-
Elm və təhsil19:12
Emin Əmrullayev ona VƏZİFƏ VERDİ
-
Kriminal18:12
Tulin Ələkbərovanın sevgilisi tərəfindən döyülməsi faktı araşdırıldı: nəticə... - VİDEO
-
Kriminal17:32
Faciəvi şəkildə ölən tələbənin ailəsi məhkəməyə getməkdən imtina etdi - FOTO
-
Nida Təhlil 17:11
İrəvan “Krokus”la bağlı bəyanatı rədd etdi: Kreml necə cəzalandıracaq?
-
Sosial16:58
Bu avtomobillərlə taksi fəaliyyəti göstərmək qadağan edildi