Cinayət tarixçəsi
“Cibindən sevgi məktubu tapdım...“ - Bir cinayətin tarixçəsi
1972-cı ildə Özbəkistan Respublikasının Səmərqənd vilayətində anadan olmuş Eqamberdiyev qətl hadisəsi törədənə kimi Abşeron rayonu, Mehdiabad qəsəbəsində yaşayıb.
İstintaq materiallarına görə, Sultanjon Eqamberdiyev qeyri-rəsmi
nikahda olduğu Samirə Mikayılovanın xalatının cibindən sevgi
məktubu tapıb. Bundan sonra aralarında dəfələrlə mübahisə və
dava-dalaş düşüb. Növbəti dəfə 17 iyul 2011-ci ildə yenidən
ər-arvad məktub davasına çıxıb. Samirə ərindən məktubu ya
qaytarmasını, ya da yandırmasını tələb edib. Sultanjon arvadının
dedikləri ilə razılaşmadıqda, qadın ondan ayrılmaq istədiyini,
bundan sonra kiminlə istəsə görüşəcəyini bildirib.
Qısqanclıqdan ağlı başından çıxmış ər qeyri-rəsmi nikahda olduğu
arvadından intiqam almaq qərarına gəlir. Masanın üzərindəki mətbəx
bıçağını qapıb Samirə Mikayılovanın qarın və döş qəfəsindən 2 zərbə
vuraraq ona ağır bədən xəsarəti yetirir. Çoxlu qanitirmə
nəticəsində Samirə Mikayılova dünyasını dəyişir.
"Arvadımın maşından düşdüyünü gözlərimlə
gördüm"
Sultanjon Eqamberdiyev ona elan olunmuş ittihamla özünü təqsirli
bilib. O, ifadəsində 1993-cü ildən Samirə Mikayılova ilə ər-arvad
kimi yaşadığını, lakin rəsmi nikahları olmadığını göstərib: "Birgə
yaşadığımız dövrdə 3 uşağımız olub. Mən şəxsi evlərdə usta
işləyirdim. 2011-ci ilin mart-aprel aylarından Samirə ilə aramızda
maddi çətinlik üzündən tez-tez mübahisəmiz düşürdü. Təxminən
2011-ci ilin mayında axşam vaxtı Samirəni qarşılamaq üçün evdən
küçəyə çıxanda bir avtomobilin küçəyə dönərək dayanıb işıqlarını
söndürdüyünü gördüm. 15-20 dəqiqədən sonra avtomobil yerindən
tərpənib bizim evin qabağında qaranlıq bir yerdə dayandı. Təxminən
15 dəqiqə sonra həmin maşından Samirə düşdü.
"Arvadımdan şübhələnməyə başlamışdım"
Evdə Samirədən maşının sürücüsünün kim olduğunu soruşdum. Dedi ki,
maşını sürən müdiri Rəşaddır, gec olduğuna görə onu özü evə
gətirib. Bundan sonra arvadımdan şübhələnməyə başladım. Ondan
dəfələrlə işdən çıxmağını tələb etmişdim. Hətta bu barədə Samirənin
bizimlə qonşuluqda yaşayan qardaşı Habilə və valideynlərinə də
danışmışdım.
Nəhayət, bir gün evdə Samirənin paltarının cibindən müdiri Rəşada
yazılmış sevgi məktubu tapdım. Məktubda Samirə Rəşada onu necə
sevdiyini, ürəyinin ancaq ona aid olduğunu, ondan uşaq istədiyi
yazmışdı. Samirə ilə danışanda o, mənə "səni qısqandırmaq üçün
yazmışam, Rəşadla aramızda heç bir şey olmayıb, o kağız boş bir
şeydir" dedi.
Samirə məktubu yandırmağım üçün mənə yalvar-yaxar etməyə başladı.
Dedim ki, əgər Rəşadla əlaqəni birdəfəlik kəssə, ailəsinə bağlı
qalsa, heç kimə bir söz deməyəcəyəm, hər şeyi yaddan çıxardacağam.
Samirə də hər şeyi unudacağını, lakin məktubu tez bir zamanda
yandırmağımı istədi. Məktubu yandırmayıb saxlayacağımı
bildirdim.
"Ürəyim kiminlə istəyirsə, onunla da gəzəcəm"
17 iyul 2011-ci ildə saat 9 radələrində evdə arvadım Samirə və
böyük qızım Şəhla ilə səhər yeməyi yeyərkən işə getmək üçün
yolpulum olmadığını dedim. Samirə qışqırmağa başladı, özünün iş
tapıb işləyəcəyini, uşaqlara baxacağını dedi, məndənsə evdən çıxıb
getməyimi tələb etdi.
Həmin vaxt qızım Şəhla qonşu otaqda idi. Otağın qapısını bağladım
ki, qızım heç nə eşitməsin. Samirəyə: "Özünə iş axtarma!" dedim. O,
yenə hay-küy saldı, ürəyi kiminlə istəyirsə, onunla da gəzəcəyini
dedi.
Bu sözlərə dözə bilməyib bərk əsəbiləşdim. Masanın üstündəki mətbəx
bıçağını əlimə götürdüm, divanda oturmuş Samirənin saçlarından
yapışdım... Onu sinəsindən bıçaqla vurdum. Səsə qızım Şəhla gəldi,
anasının sinəsinə sancılmış bıçağı gördü və dartıb çıxartdı".
"Qızımın hansı səbəbdən öldürülməsini
bilmirəm"
Samirənin zərərçəkmiş şəxs qismində dindirilən atası Maqsud
Mikayılov: "Əslən Zəngilan rayonundanıq. Məcburi köçkün kimi
Mehdiabadda məskunlaşmışıq. Sultanjon Eqamberdiyev qızım Samirə ilə
qeyri-rəsmi nikahda olub. Səhər-səhər oğlum Habillə qəsəbədə o biri
oğlum üçün aldığımız torpaq sahəsinə işləmək üçün getmişdik.
Evdən çıxandan 15-20 dəqiqə sonra Habilə zəng gəldi, Sultanjonun
Samirəni bıçaqla vurduğunu dedilər. Əvvəl düşündüm ki, yüngül
xəsarətdir. Ona görə də Habil evə tək qayıtdı ki, Samirəni
xəstəxanaya aparsınlar. Amma Habil evdən zəng edərək Sultanjonun
Samirəni bıçaqla vurub öldürdüyünü dedi. Sultanjonun qızımı hansı
səbəbdən öldürməsini bilmirəm".
"Bıçağı çıxardıb yerə tulladım"
Şahid qismində dindirilən Şəhla Eqamberdiyeva ifadəsində hadisə baş
verən gün səhər yeməyi hazırladığını göstərib: "Mətbəxdə səhər
yeməyi hazırlayırdım. Atamla anam evdə idilər. Bacım Nisə mağazaya
getmişdi, Gülnisə isə nənəmgildə qalmışdı. Nənəmgil bizə bitişik
evdə yaşayırdılar. Atam işə getməli, əvvəlki işlərinə görə gecikmiş
maaşını almalı idi. Yol pulu olmadığına görə məndən 1-2 manat pulum
olub-olmadığını soruşdu. Ona pulum olmadığını dedim və yataq
otağına keçdim. Həmin vaxt atamla anam nəsə sakit səslə
danışırdılar. Yalnız anamın "məktubu qaytar, yandırım məktubu"
sözlərini eşidirdim.
Yataq otağına keçən kimi atam otağın qapısını bağladı. 1-2 dəqiqə
sonra anamın qışqırıq səsini eşidib mətbəxə qaçdım. Qapını açanda
anamın sinəsinə mətbəxdə işlətdiyimiz bıçağın sancıldığını gördüm.
Tez anamın sinəsindəki bıçağı çıxardıb yerə atdım və nənəgilə
qaçdım...
"Anam məktubu atamın götürdüyünü başa düşdü"
Hadisədən bir neçə gün qabaq evdə anamın məktub yazdığını görəndə
onunla maraqlandım. Anam əli ilə məktubun üstünü tutub mənə
əhəmiyyətli bir şey olmadığını dedi. O biri otağa keçib televizora
baxdım. Bu zaman anam məktubu yazıb bitirdi, mən olan otağa keçib,
döşəyin arasında gizlətdi. Sonra evdən çıxıb anasıgilə getdi.
Məktubu götürüb oxudum. Məktub "Salam Rəşka" sözü ilə başlayırdı.
Bərk əsəbiləşdim, halım dəyişdi. Anam evə gələrkən mənim əsəbi
görüb nə baş verdiyini soruşdu. Anamdan: "Bu nə məktubdur, kimə
yazmısan" deyə soruşduqda acıqlandı, məktubu yandıracağını dedi.
İki gündən sonra anam məndən xalatın cibindən həmin məktubu
götürüb-götürmədiyimi soruşdu. Mən də ona məktubu görmədiyimi
dedim. Anam məktubu atamın götürdüyünü başa düşdü.
Atam axşam işdən gələndə anamla bu barədə danışmağa başladılar.
Həyətdə oturduğum üçün onların nə danışdığını eşitməmişəm. Anam
çıxıb mənə: "Gəl atana denən həmin məktub kimindir" dedi. Mən də
atama yalandan məktubu salonda işləyən bir qızın yazdığını və
Samirəyə saxlamaq üçün verdiyini bildirdim. Atama bu cür deməyimi
anam məndən xahiş etmişdi. Ancaq atam inanmadı".
"Bizim aramızda heç bir münasibət olmayıb"
Şahid qismində dindirilən Rəşad İmanov ifadəsində Samirə
Mikayılovanın 2011-ci ilin may ayında onlara məxsus olan un
məmulatları bişirilən sexə gələrək maddi imkansızlıqdan şikayət
edib iş axtardığını söylədiyini göstərib: "Qardaşım Fərhad Samirəni
işə götürdü. Samirə 15-16 gün işlədikdən sonra əri onun işləməsini
istəmədiyi üçün işdən çıxartdı. 17 iyul 2011-ci ildə isə əmim oğlu
mənə keçmiş işçimiz Samirənin əri tərəfindən bıçaqlanaraq
öldürüldüyünü xəbər verdi. Samirənin nə səbəbə görə öldürülməsini
bilmirəm. O, bizim sexdə işlədiyi müddətdə 3 dəfə maşınla evlərinə
aparmışam. Lakin biz heç vaxt tək olmamışıq. Samirə ilə mənim
aramda heç bir münasibət olmayıb. Mənim adıma yazılmış məktub
barədə də məlumatım yoxdur.
Tanımadığım mobil telefon nömrəsindən Samirə Mikayılova mənim mobil
telefonuma zəng edib dedi: "Ərim məndən səninlə hər hansı əlaqəmin
olub-olmadığını soruşub. Mən də demişəm ki, heç bir əlaqəm yoxdur.
Ərim mənə and içdirib, mən də and içmişəm. Əgər sənin yanına gəlib
mənimlə hər-hansı əlaqənin olub-olmadığını soruşub and içməyini
istəsə, ərim deyəni elə, biabırçılıq olmasın" . Ondan soruşdum ki,
nə məsələdir, nə üçün mənim adım ortada hallanır? Samirə dedi ki,
özü də bilmir. Dedim ki, problem yoxdur, qoy gəlsin, söhbət edərik.
Lakin Samirənin əri mənim yanıma gəlmədi".
Bu cinayət işi Bakı Ağır Cinayətlər Məhkəməsində araşdırılıb.
Məhkəmənin hökmü ilə Eqamberdiyev Sultanjon Jumabayeviç 9 il
müddətinə azadlıqdan məhrum edilib.
Hacı Zeynalov
Publika.Az
-
Nida Xəbər 14:34
Moskva İrəvandan tələb etdi: Brüsseldə hazırlanmış plana reaksiya gözləyirik
-
İdman13:46
"Real"ın ÇL-dəki qəhrəmanı bu gözəllə eşq yaşayır - FOTOLAR
-
Avropa13:16
Fransanın ikiüzlülüyü: Avropada Rusiya qazının ən böyük alıcısı oldu
-
Region12:41
Özünün dənizə çıxışı yoxdur, başqalarını şirnikləndirir: İrəvan Ər-Riyadda nə təklif edib?
-
Hadisə12:15
Məktəbin həyətində faciəvi şəkildə ölən 10 yaşlı Fərhanın FOTOSU
-
Nida Xəbər 11:43
Prezidentin yüksək vəzifəyə təyin etdiyi Anar Axundov kimdir? - DOSYE
-
Sosial11:12
Aytən Səfərovanın son vəziyyəti AÇIQLANDI
-
Cənubi Qafqaz10:55
Rusiyanın Gümrüdəki hərbi bazasına hücum oldu - DETALLAR