Trampın qərarına daha bir etiraz – İSTEFA

İŞİD-lə mübarizə üzrə koalisiyada ABŞ-ın xüsusi nümayəndəsi Brett Makqerk Amerika qoşunlarının Suriyadan çıxarılmasına etiraz olaraq istefa verib.

Publika.az xəbər verir ki, bu haqda mənbələrə istinadən CBS telekanalı bildirib.

“Brett Makqerk 2019-cu ilin fevralında öz vəzifəsini tərk etməyə hazırlaşırdı. Amma mənbələrin sözlərinə görə, o, dövlət katibi Mayk Pompeoya məlumat verib ki, Amerika qoşunlarının Suriyadan çıxarılması haqqında prezident Donald Trampın qəfil qərarı ilə razılaşmayaraq öz gedişini sürətləndirəcək. Makqerk hesab edir ki, Trampın qərarı faktiki olaraq, ABŞ-ın regionda müttəfiqlərini atmaq anlamına gəlir”, - telekanal xəbər verib.

Xatırladaq ki, dekabrın 18-də ABŞ Prezidenti Donald Tramp ABŞ qoşunlarının Suriyadan tamamilə çıxarılması barədə göstəriş verib. Donald Tramp özünün “Twitter” səhifəsində İŞİD qruplaşmasının məğlub edildiyini və qoşunların Suriyada mövcudluğunun yeganə səbəbinin bu olduğunu yazıb.

ABŞ Müdafiə Nazirliyi Trampın onlara hərbi kontingenti Suriyadan geri çəkmək barədə əmr verdiyini təsdiqləyib.

Telekanal Suriyada iki minə yaxın amerikalı hərbçinin olduğunu qeyd edir. Qoşunların 60-100 gün ərzində Suriyanı tərk edəcəyi bildirilir.

Qeyd edək ki, bu, ABŞ qoşunlarının Suriyadan çıxarılmasına etiraz olaraq verilən ikinci istefa qərarıdır. Daha əvvəl müdafiə naziri Ceyms Mettis istefa verib.

Ömər