Blinken Türkiyəyə gedəcək

ABŞ dövlət katibi Entoni Blinken Avropa turnesinə yola düşür, o, fevralın 16-dan 22-dək Türkiyə, Yunanıstan və Almaniyada səfər edəcək və Münhen Təhlükəsizlik Konfransında çıxış edəcək.

Publika.az xəbər verir ki, bu barədə ABŞ Dövlət Departamentindən bildirilib.

Məlumata əsasən, E.Blinkenin turnesi Almaniyaya səfərlə başlayacaq və fevralın 16-da konfransda iştirak edəcək. Konfrans çərçivəsində o, bir sıra görüşlər keçirəcək və bu görüşlərdə Ukrayna, eləcə də zəlzələdən sonra Türkiyə və Suriyaya dəstək, həmçinin transatlantik təhlükəsizlik mövzularını müzakirə edəcək.

Bundan sonra E.Blinken fevralın 19-da Türkiyənin İncirlik aviabazasına, oradan isə Ankaraya gedəcək və orada Türkiyənin xarici işlər naziri Mövlud Çavuşoğlu və digər rəsmi şəxslərlə görüşəcək.

Yunanıstan səfərin son nöqtəsi olacaq. E.Blinkenin Afinada baş nazir Kiriakos Mitsotakis, xarici işlər naziri Nikos Dendias və müxalifət lideri Aleksis Tsiprasla görüşəcəyi gözlənilir. Görüşlər fevralın 21-nə planlaşdırılıb.