Ukrayna ciddi bəlada: ABŞ münaqişədən çıxır - İDDİA

ABŞ prezidenti Donald Tramp Ukrayna ilə bağlı mümkün tədbirləri müzakirə etmək üçün bu gün milli təhlükəsizlik komandası ilə görüşəcək.

Publika.az xəbər verir ki, bu barədə “The New York Times” amerikalı rəsmiyə istinadən məlumat yayıb.

Bildirilir ki, görüş zamanı Vladimir Zelenskiyə hərbi yardımın dayandırılması və ya ləğvi müzakirə oluna bilər. Sözügedən yardım Bayden administrasiyası tərəfindən razılaşdırılıb, bura döyüş sursatı və hərbi texnika daxil edilib.

Görüşdə digərləri ilə yanaşı, ABŞ dövlət katibi Marko Rubio və Pentaqonun rəhbəri Pit Heqset də iştirak edəcək.

Artıq üçüncü gündür ki, bütün dünya ABŞ prezidenti Donald Trampla Ukrayna lideri Vladimir Zelenski arasındakı mübahisəni müzakirə edir.

ABŞ-ın vitse-prezidenti J.D.Vensin Zelenskini təkəbbürünə və kobudluğuna görə tənqid etməsi prezident Trampın xoşuna gəlib.

Bu arada, "Beynəlxalq İcmal" televiziya proqramının aparıcısı, Valday Klubunun Tədqiqatlar üzrə direktoru Fyodor Lukyanov qeyd edib ki, Ağ Evdəki ictimai qalmaqal ABŞ-ın Ukrayna münaqişəsindən çıxması ilə başa çatıb.

Adəm Abbaslı