Nüvə apokalipsisinə hazırlıq: Trampın gizli bunkeri üzə çıxdı - ŞOK DETALLAR

Artan geosiyasi qeyri-sabitlik fonunda Tramp administrasiyası ciddi məxfilik pərdəsini bir qədər aralayaraq jurnalistlərə planetin ən qorunan məkanlarından birinə - ABŞ rəhbərliyinin Üçüncü Dünya Müharibəsi halında sağ qalması üçün nəzərdə tutulmuş yeraltı bunkerdə daxil olmağa icazə verib.

Publika.az xəbər verir ki, bu barədə Britaniyanın "The Sun" qəzeti məlumat yayıb.

Şayenn Dağı kimi tanınan nəhəng kompleks sadəcə ABŞ Prezidentinin sığınacağı deyil, Kolorado dağlarının qranit qayalarında oyulmuş, tamamilə avtonom bir şəhərdir. Onun polad qapıları istənilən an bağlanaraq seçilmiş şəxsləri nüvə apokalipsisindən ayıra bilər.

1966-cı ildə, Soyuq Müharibənin zirvəsində, 142 milyon dollara başa gələn bu obyektin bu gün dəyəri bir milyarddan çox olardı. Sovet nüvə təhlükəsinə cavab olaraq layihələndirilmiş bu bunker hələ də dövlət idarəçiliyinin fasiləsizliyini təmin edən sistemin əsas dayağı sayılır. ABŞ Silahlı Qüvvələrinin Şimali Komandanlığının rəhbəri general Qreqori Giyo burada xeyli vaxt keçirdiyini bildirərək bunkerin strateji əhəmiyyətini vurğulayıb. O, müasir təhdidlər - Rusiya təyyarələri, Çin aerostatları və ya kibertəhlükələr qarşısında qorxu hiss etmədiyini, ABŞ ordusunun tam hazırlıqlı olduğunu bəyan edib.

Mühəndislik miqyası təsir edicidir. Təxminən 20 min kvadratmetr sahəni əhatə edən kompleks, nəhəng yaylar üzərində qurulmuş 15 əsas konstruksiyadan ibarət tunellər və zallardan ibarət labirintdir. Bu sistem yaxınlıqdakı nüvə partlayışının dağıdıcı zərbə dalğasını udmaq üçün nəzərdə tutulub — belə partlayışın gücü, iddialara görə, Hirosimaya atılmış bombadan min dəfə artıq ola bilər. Demək olar ki, bir metr qalınlığında olan polad qapılar qranitlə qorunur və cəmi 45 saniyədə daxili sahəni hermetik şəkildə bağlaya bilir. Maraqlıdır ki, bu qapılar ilk dəfə real təhlükə zamanı Soyuq Müharibə illərində deyil, 11 sentyabr 2001-ci ildə bağlanıb - bu, dövrün yeni çağırışlarını xatırladan qaranlıq bir simvol olub.

“Döyüş körpüsü” adlanan bu yeraltı məkan avtonom rejimdə uzun müddət yaşamaq üçün nəzərdə tutulub. Kompleksin öz elektrik stansiyası, içməli su ilə dolu yeraltı gölləri və nəhəng ərzaq ehtiyatları var. Hətta burada “dünyanın ən qorunan "Subway" restoranı” fəaliyyət göstərir - bu, Qiyamət günü sığınacağında normal həyatın illüziyasını yaradan bir detal kimi görünür. 2008-ci ildə obyekt NORAD qərargahından ehtiyat komanda mərkəzinə çevrilsə də, personal hələ də növbə çəkir və onun daimi hazırlığını təmin edir. Baza direktorunun müavini Stiv Rouz 2018-ci ildə bildirmişdi ki, bunker keçmişin qalığı deyil, dünyanın ən təhlükəsiz tikilisi olaraq strateji əhəmiyyətini qoruyur.

Nüvə müharibəsi halında fəaliyyət planı incəliklə işlənib. ABŞ Prezidenti dərhal Ağ Evin yeraltı sığınacağına aparılacaq, sonra isə “Qiyamət günü təyyarəsi” adlanan xüsusi komanda təyyarəsi ilə uçuş edəcək. Eyni zamanda müdafiə naziri, kabinet üzvləri və Konqres liderləri Virciniyadakı "Mount Weather" mərkəzinə və ya Pensilvaniyadakı "Raven Rock" yeraltı kompleksinə evakuasiya olunacaq. Bu, tammiqyaslı münaqişə şəraitində ölkənin davamlı və paylanmış idarəçiliyini təmin edəcək. Beləliklə, Şayenn Dağının qranit zalları sadəcə sığınacaq deyil, müdafiə və bəlkə də bütün Qərb dünyasının idarə olunduğu əməliyyat qərargahı rolunu oynayacaq. Bu qalalar insanlığın ən pis ssenariyə hazırlığını simvolizə edən səssiz, lakin qorxulu bir xəbərdarlıqdır - qarşılıqlı zəmanətli məhv kölgəsi hələ də qlobal siyasətin üzərində dolaşır, deyə məqalədə qeyd olunur.

Hüseyn İbadlı