ABŞ

“Əl-Qaidə” komandiri öldürüldü

30 Noyabr 2025 09:42

ABŞ Silahlı Qüvvələri Yəmənin Marib vilayətində pilotsuz uçuş aparatı vasitəsilə "Əl-Qaidə" terror təşkilatının yerli komandirini zərərsizləşdirib.

Publika.az xəbər verir ki, bu barədə Səudiyyə Ərəbistanının "Al Hadath" telekanalı məlumat yayıb.

Bildirilib ki, Marib vilayətinin Əl-Vadi dairəsində iki nəfərin olduğu motosikletə hava zərbəsi endirilib. Nəticədə təşkilatın sahə komandirlərindən biri — Münir Bacli Əl-Əhdəl (Abo əl-Hayca əl-Hədidi adı ilə də tanınır) və onu müşayiət edən daha bir şəxs məhv edilib.

Yəmənli jurnalist Məhəmməd bin Feysəl bildirib ki, Əl-Əhdəl ölkədə "Əl-Qaidə"nin əsas rəhbərlərindən biri sayılır.

Qeyd olunur ki, ABŞ tərəfindən uzun müddət ən təhlükəli terrorçu qruplaşma kimi qiymətləndirilən “Əl-Qaidə Ərəbistan Yarımadasında” təşkilatı Yəməndə artıq 10 ildən çoxdur davam edən hökumət qüvvələri ilə “Ənsarullah” hərəkatı (husilər) arasındakı münaqişədən istifadə edərək mövqelərini gücləndirib.