Superkompüter Dünya Kubokunun favoritini AÇIQLADI

"Opta" statistik platformasının superkompüteri futbol üzrə dünya çempionatının pley-off mərhələsinin əvvəlində Fransanı turnirin əsas favoriti adlandırıb.

Publika.az xəbər verir ki, Fransanın qələbə qazanma ehtimalı 18,7% qiymətləndirilir. Favoritlər üçlüyünə həmçinin Argentina (16,3%) və İspaniya (13,5%) milli komandaları daxildir.

Fransa 2026-cı il dünya çempionatının üçüncü turunun oyununda Norveçə qalib gəlib.

Oyun Massaçusets ştatının Foksboro şəhərindəki "Jillett" stadionunda keçirilib və 4:1 hesabı ilə başa çatıb. Qaliblərin heyətində hücumçu Usman Dembele het-trik edib, digər qolu isə Dezire Due vurub. Norveçlilərdən Telo Osqaard fərqlənib.

Bu qələbədən sonra fransızlar doqquz xal toplayaraq I qrupun turnir cədvəlində birinci pillədə möhkəmləniblər. Norveçlilər isə altı xal toplayaraq ikinci olublar.

Dünya çempionatı iyunun 11-dən iyulun 19-dək ABŞ, Meksika və Kanadada keçirilir. Hazırkı dünya çempionu 2022-ci ilin finalında Fransa milli komandasına qalib gələn Argentina yığmasıdır.

Hüseyn İbadlı