Tramp Kubaya görə ABŞ-da fövqəladə vəziyyət ELAN ETDİ

ABŞ Prezidenti Donald Tramp Kubadan qaynaqlanan milli təhlükəsizlik təhdidi səbəbindən ölkədə fövqəladə vəziyyət elan edib.

Publika.az xəbər verir ki, bu barədə Ağ Evin saytında məlumat verilib.

Onun sözlərinə görə, Kuba hökumətinin siyasəti və fəaliyyəti ABŞ-ın milli təhlükəsizliyinə və xarici siyasətinə birbaşa təhdid yaradır.

Tramp əlavə edib ki, fövqəladə vəziyyətlə mübarizə çərçivəsində tarif sistemi yaradılacaq. Həmin sistemə əsasən, Kubaya birbaşa və ya dolayı yolla neft satan və ya tədarük edən xarici dövlətin məhsulu olan idxal mallarına qiymətə uyğun əlavə rüsum tətbiq oluna bilər.

Yanvarın 24-də Politico qəzeti yazıb ki, Tramp administrasiyası Kubaya neft tədarükünü dayandırmaq və ölkədə hakimiyyət dəyişikliyinə nail olmaq məqsədilə dəniz blokadası tətbiq etmək imkanını müzakirə edir. Nəşrin mənbələrinin sözlərinə görə, ABŞ Dövlət katibi Marko Rubio neft blokadası ideyasını dəstəkləyir, lakin məsələ ilə bağlı yekun qərar hələ qəbul olunmayıb.

Hüseyn İbadlı