Tramp İranla bağlı xalqa müraciət edəcək

ABŞ Prezidenti Donald Tramp çərşənbə günü, 1 aprel tarixində İrana qarşı hərbi əməliyyatla bağlı xalqa müraciət edəcək.

Publika.az xəbər verir ki, bu barədə Ağ Evin mətbuat katibi Kerolayn Levitt "X" sosial şəbəkəsində məlumat verib.

"ABŞ Prezidenti Donald Tramp çərşənbə günü Vaşinqton vaxtı ilə saat 21:00-da İranla bağlı mühüm yenilikləri təqdim etmək üçün xalqa xüsusi müraciət edəcək", — deyə o yazıb.

Bundan qısa müddət əvvəl Amerika lideri Birləşmiş Ştatların İrana qarşı hərbi əməliyyatı iki-üç həftə ərzində başa çatdıra biləcəyini bəyan etmişdi. Martın 30-da Levitt Trampın aprelin 6-na qədər İranla sövdələşmə bağlamaq niyyətində olduğunu bildirmişdi.

Xatırladaq ki, fevralın 28-də ABŞ İsrail ilə birlikdə İrana qarşı hərbi əməliyyata başlayıb. İslam Respublikasında bir çox şəhərlər, o cümlədən paytaxt hücuma məruz qalıb. Zərbələrdən biri ali rəhbər Əli Xameneinin iqamətgahına endirilib və o, həlak olub. Cavab olaraq İran İsrailə, ABŞ-ın hərbi bazalarına və Vaşinqtonun Yaxın Şərqdəki müttəfiqlərinə raket və pilotsuz uçuş aparatları ilə zərbələr endirir.

Hüseyn İbadlı