Xalq artisti şair və psixoloq həyatından danışan serialda - VİDEO

Xalq artisti Mehriban Zəki Yutubda yayımlanacaq “ŞeirSən” adlı serialda rol alıb.

Publika.az xəbər verir ki, ekran işinin ilk çəkilişlərinə artıq start verilib. Aktrisanın baş rolu ifa etdiyi serial 7 hissədən ibarətdir. Şair və psixoloq arasında yaşanan münasibətlərdən bəhs olunan, psixoloji dram janrında çəkilən layihənin rejissoru və ssenari müəllifi Nihad İsadır.

Yutub üçün çəkilən layihə öz düşüncələri içində it-bat olmuş bir şairin daxili böhrandan çıxmasından bəhs edir. Bunun üçün çalışan psixoloq qəliz düyünlərin açılmasına cəhd edir. Sözlərin yükünü daşımaqla görəvləndirilmiş şairin daxili aləmində olan obrazların işə qarışması isə psixoloqun işini daha da çətinləşdirir. Hər bölümdə bir başqa şeirin yazılma hekayəsi və qəhrəmanın başına gələnlər daha dinamik xarakter almağa başlayır.

Layihənin tanıtım çarxı “ISArt” kanalında yayımlanıb. “ISArt production” 2020-ci ildə Nihad İsa tərəfindən təsis edilib.

Xatırladaq ki, N.İsa 2016-2019-cu illərdə İstanbulda yaşayıb, “Ay yapım”, “Netflix Turkey” (Aşk 101), Blu TV kimi böyük şirkətlərlə əməkdaşlıq edib.