İtaliyada koronavirus ən təhlükəli səviyyəyə çatdı - Ordu, tibb işçiləri və hökumət üzvləri...

İtaliyada 2 həftə əvvəl sürətlə yayılmağa başlayan yeni tip koronavirus (COVID-19) hökuməti hərəkətə keçirib.

Publika.az xəbər verir ki, ölkə miqyasında fövqəladə vəziyyət elan olunub.

Baş nazir Cüzeppe Konte epidemiyaya qarşı görülən tədbirlərin bütün ölkə ərazisində tətbiq olunacağını açıqlayıb. O, ölkədə qırmızı təhlükə səviyyəsi elan edib: “Ölən və virusa yoluxanların sayı əhəmiyyətli şəkildə artıb. Artıq zaman qalmadı. Hamımız İtaliyanın yaxşılığı üçün nələrdənsə imtina etməliyik. Vərdişlərimizi dəyişdirmək məcburiyyətindəyik”.

Mülki Müdafiə xidmətinin rəhbəri Ancelo Borrelli paytaxt Romada təşkil olunan gündəlik mətbuat konfransında koronavirusa yoluxanların sayının 9 mini ötdüyünü, ölü sayının isə 460-ı keçdiyini açıqlayıb.

Hökumətin qəbul etdiyi tədbirlər sırasında iş və səhiyyə məsələləri xaricində evdən bayıra çıxmaq qadağan edilib. Sadəcə tibb işçiləri, ordu mənsubları və hökumət üzvləri sərbəst hərəkət edə bilər. Bütün təhsil ocaqları 3 aprel tarixinə qədər bağlanıb. Həmin vaxta kimi bütün idman müsabiqələri təxirə salınıb.

Sosial mediada “mən evdə qalıram” adı altında kampaniya başladılıb.

Qeyd edək ki, İtaliya koronavirusun ortaya çıxdığı Çindən, ən çox yayılan Cənubi Koreyadan sonra epidemiyanın ölçüsünə görə 3-cü sırada qərarlaşıb.

Zümrüd