Karantin rejimi yumşaldılır, yaşlılar küçəyə çıxır - Avropada dəyişikliklər

Bəzi Avropa ölkələri yeni tip koronavirus pandemiyasının qarşısını almaq məqsədilə aparılan kəskin qabaqlayıcı tədbirləri yumşaltmağa başlayıb.

Publika.az xəbər verir ki, Çexiyanın Baş naziri Andrey Babiş 13 martda elan olunan fövqəladə vəziyyətin yenidən uzadılmasının tərəfdarı olmadığını bildirib.

Çexiya Ticarət Palatasının prezidenti Vladimir Dlouhi hökumətin tədbirləri yumşaltmaqda gecikdiyini dilə gətirib.

7 min 41 nəfərin infeksiyaya yoluxduğu Çexiyada 204 nəfər dünyasını dəyişib. Ölkədə virusun yayılma sürəti azalmağa başlayıb.

Polşada isə virusa yoluxanların sayı 10 min 34-ə çatıb. 404 nəfər ölüb. Siyasətçilər və həkimlər infeksiyadan sağalanları qan bağışlamağa çağırıb.

Serbiyada meyvə-tərəvəz bazarları yenidən açılıb. Fövqəladə vəziyyətin davam etdiyi ölkədə hökumət bəzi tədbirləri ləğv etməyə başlayıb. Bu çərçivədə 65 yaşdan yuxarı vətəndaşların həftədə 3 dəfə evdən çıxmasına və bəzi mağazaların açılmasına icazə verilib. Ölkədə bu günə qədər 130 nəfər koronavirusdan dünyasını dəyişib.

Qeyd edək ki, daha əvvəl Almaniya və İtaliya da bənzər qərarlar qəbul etmişdi.

Zümrüd