Avropada RUSİYA XOFU: Finlandiya özünü belə qorumaq istəyir

Aprelin 14-də Finlandiya Rusiya ilə sərhəd divarının 75 kilometrlik hissəsinin tikintisinə başlayıb.

Publika.az xəbər verir ki, bu barədə “Reuters” məlumat yayıb.

Finlandiya Avropa Birliyinin şərq sərhədi olan Polşada 2021-ci ilin qışında baş verənlərin təkrarlanmasının qarşısını almağı hədəfləyir. O vaxt blok Rusiyanın sadiq müttəfiqi olan qonşu Belarusu Yaxın Şərqdən miqrantlar gətirməkdə, onlara viza verməkdə və böhran yaratmaqda ittiham edirdi.

Keçən il Finlandiya sərhədini qanunsuz keçmə ilə bağlı 30 fakt qeydə alınıb, Rusiya sərhədçiləri Finlandiyaya 800-ə yaxın girişin qarşısını alıblar.

“Finlandiya-Rusiya sərhədində vəziyyət hazırda stabildir”, - sərhəd mühafizə xidməti briqadasının generalı Yari Tolppanen bildirib.

Mənbənin sözlərinə görə, polad hörgüdən hörülmüş sərhəd divarının hündürlüyü 3 metrdir və onun üzərinə tikanlı məftillər çəkiləcək. Divarlar gecə videomüşahidə rejimi, vacib sahələrin işıqlandırılması və dinamiklərlə təchiz olunub.

Finlandiya 2026-cı ilin sonuna qədər sərhədinin ən mühüm hissələrinin 200 kilometri (125 mil) boyunca divar tikməyi planlaşdırır.

Məlumat üçün bildirək ki, 2022-ci ilin fevralında Polşa və Baltikyanı ölkələr Ukraynanı işğal edən Rusiya və Belarusla sərhədlərində maneələr çəkməyə başlayıblar.

İndiyədək Finlandiya-Rusiya sərhədi geniş meşələrdə sadə bir xətt və alçaq məftilli hasarlarla ayrılırdı. Bu hasarlar insanları yox, ev heyvanlarını və mal-qaranı içəri buraxırdı.

Qeyd edək ki, bu il aprelin 4-də Finlandiya NATO-ya 31-ci üzv kimi qəbul edilib.

Hüseyn İbadlı