Avropa

Məşhur siam əkizləri uşaq dünyaya gətirdilər

2 Sentyabr 2025 20:48

Dünyanın ən məşhur siam əkizləri olan Ebbi və Brittani Hensel uşaq dünyaya gətiriblər.

Publika.az xəbər verir ki bu barədə "People" məlumat yayıb.

Onları bir neçə dəfə yenidoğulmuş körpə ilə gəzintidə görüblər: əkizlər küçədə uşaq oturacağı daşıyıb və uşaq arabası sürüblər. Şahidlərin sözlərinə görə, Hensel bacıları körpəni işlədikləri məktəbə də qısa müddətlik gətiriblər ki, onu həmkarlarına göstərsinlər.

Uşağın doğulması faktı hələ ki nə Ebbi və Brittani, nə də Ebbinin həyat yoldaşı Coş Boulinq tərəfindən rəsmi şəkildə təsdiqlənib.

Ebbi və Brittani Hensel bir bədəndə iki başla doğulublar. Onlar döş qəfəsi nahiyəsində birləşiblər: hər biri bədənin öz hissəsinə nəzarət edir, lakin onların bağırsaqları, sidik kisəsi və reproduktiv orqanları ortaqdır. Ebbi və Coş Boulinq 2021-ci ildə evləniblər, lakin bu evlilik barədə məlumat ictimaiyyətə yalnız 2024-cü ildə məlum olub.

Hüseyn İbadlı