Atlantikdə nələr baş verir? - Rusiya və Britaniyanın dalğalar altında döyüşü

“İkinci Dünya müharibəsindən sonra Böyük Britaniya ilk dəfə Atlantik okeanında Rusiyaya məğlub olmağa yaxındır”.

Publika.az xəbər verir ki, bu barədə Britaniya Hərbi Dəniz Qüvvələrinin komandanı birinci lord Qvin Cenkins deyib.

Onun sözlərinə görə, Rusiya “milyonlarla itkilərə və Ukraynanın işğalına” rəğmən, dəniz qüvvələrinə, xüsusilə də Şimal Donanmasına sərmayə qoyub.

“İkinci Dünya müharibəsinin və “soyuq müharibə”nin başa çatmasından sonra Atlantik okeanında əldə etdiyimiz ütünlük təhdid altındadır. Gücümüz qalır, lakin uzunmüddətli deyil. Potensial düşmənlərimiz milyardlarla sərmayə yatırırlar. Biz səylərimizi gücləndirməliyik, əks təqdirdə üstünlüyü əldən verəcəyik”, - britaniyalı general bildirib.

Cenkins qeyd edib ki, son iki ildə Rusiyanın britaniya sularına müdaxiləsi 30 faiz artıb: “Dənizaltı kabellərin xəritələşdirilməsində şübhəli bilinən “Yantar” kimi casus gəmilərinin mövcudluğu bunu isbat edir. Lakin “Yantar” təhlükənin açıq şəkildə gördüyümüz hissəsidir, görünməyən tərəflər də var. Məni ən çox narahat edən dalğaların altında baş verənlərdir”.

O, Britaniyanın yeni texnologiyalardan istifadə edərək, “sualtı döyüş məkanında” müharibə apardığını da vurğulayıb.

Qeyd edək ki, noyabr ayında Rusiyanın “Yantar” casus gəmisi Britaniya sahillərində görünüb. London təhlükə yaranacağı təqdirdə, hərbi addımla bağlı xəbərdarlıq edib, Moskva isə buna kobudluqla cavab verib. Dekabrın 4-də Britaniya və Norveç Şimali Atlantik okeanında hər iki ölkənin donanmasının sualtı infrastrukturun qorunması məqsədilə birgə fəaliyyət göstərməsini nəzərdə tutan əməkdaşlıq sazişi imzalayıb.

Asif