Alimpaşa Məmmədov: "Ürəyimdən əməliyyat olunacam"

Şəmkirin keçmiş icra başçısı Alimpaşa Məmmədovun barəsində olan hökmdən verilən apellyasiya şikayəti üzrə məhkəmə prosesi keçirilib.

Publika.az xəbər verir ki, ilkin baxış prosesində hakimdən söz alan A.Məmmədov səhətində ciddi problemlərin olduğunu, bir neçə dəfə saxlanıldığını, təcridxanada halının pisləşdiyini, ürək əməliyyatı ola biləcəyi və onkoloji xəstəlikdən əziyyət çəkdiyini deyib.

Həmçinin hakimdən apellyasiyadan verilən şikayətin tez bir zamanda sonlandırılmasını və açıq tipli həbsxanaya aparılmasını xahiş edib. Hakim növbəti məhkəmə prosesini sentyabr ayının 6-a təyin edib.

Xatırladaq ki, A.Məmmədov Gəncə Ağır Cinayətlər Məhkəməsinin qərarı ilə 11 il 6 ay müddətinə azadlıqdan məhrum edilib.

O, Dövlət Təhlükəsizliyi Xidməti (DTX) tərəfindən kompleks əməliyyat-istintaq tədbirləri nəticəsində həbs edilmiş və barəsində Cinayət Məcəlləsinin 179.4-cü (mənimsəmə), 193-1.3.2-ci (cinayət yolu ilə əldə edilmiş pul vəsaitlərini leqallaşdırma), 308.2 (vəzifə səlahiyyətlərindən sui-istifadə), 311.3.2 və 311.3.3-cü (təkrar, külli miqdarda rüşvət alma) maddələri ilə ittiham irəli sürülüb və məhkəmənin qərarı ilə həbs qətimkan tədbiri seçilib.