Dəb

Cennifer Lopez göz qamaşdırdı - FOTO

31 Avqust 2021 11:28

Həftəsonu Venesiyada bəlkə də mövsümün ən möhtəşəm şousu baş tutdu: “Dolce & Gabbana Alta Moda Kuturye” dəfiləsi. İtalyan dizaynerlərin kolleksiyalarının daimi motivi olan Bizans məbədi mozaikasının naxışları və tikmələri bu dəfə dəfilənin əsas fəlsəfəsini təşkil edirdi. Açıq havada keçirilən şounun sonunda leysan yağsa da, Vivaldinin “Qış” əsəri ilə müşayiət olunan final bulud və göy gurultusu fonunda xüsusilə təsirli görünüb.

Publika.az xarici mətbuata istinadən xəbər verir ki, qarşıda hələ kişilər üçün “Alta Sartoria” şousu var və əminik ki, qonaqlar onu da səbirsizliklə gözləyirlər. Qonaqlardan söz düşmüşkən, Cennifer Lopez, Şeron Stoun, Helen Mirren, Haydi Klum, Ledi Kitti Spenser, Monika Belluççi, Leni Klum və başqaları şounun əsas ulduzları olub.

C.Lopez dəbdəbəli tərzi ilə bu dəfə də diqqət mərkəzində dayanmağı bacarıb. Lakin tərz baxımından Helen Mirrenin obrazı Cey Lonun geyimi ilə rəqabət apara bilər: Əfsanəvi aktrisa qızıl korsetli, barokko naxışlı krinolinli və şəffaf şifon qollu “Dolce & Gabbana” libasında şouya gəlib.

Şahzadə Diananın qardaşı qızı, İtalyan markasının uzun müddət elçisi olan Ledi Kitti Spenser daha təvazökar bir obraz seçib: muncuq və qaşlarla işlənmiş midi uzunluğunda krem rəngli paltar və ayaqqabı.

Monika Belluççi sadəliyə üstünlük verib: aktrisa qara geyimdə kameralar qarşısına çıxaraq poza verib. Yeri gəlmişkən, dəfilənin modelləri arasında ulduzun qızı Deva Kassel də olub.