Orta Asiyada qorxulu ssenari: türkləri üz-üzə qoymaq istəyirlər

“Atatürk hava limanı terrorunda “türk faktoru” alət edildi. Orta Asiya ölkələrinin birində yenə “türk faktoru” alət edilərək terror aktı törədilə bilər və bu çox mənfi ssenariyə səbəb olar”.

Admiral.Az xarici mediaya istinadən xəbər verir ki, bu sözləri qazaxıstanlı siyasi ekspert Nurqali Yusipbay deyib.

N.Yusipbay qeyd edib ki, son günlər üç diqqət çəkən hadisə baş verib:

“1. Ərdoğan və Putin təyyarə qəzasından sonra yaşanan gərginliyi aradan qaldırmaq qərarı verdilər. 2. Atatürk hava limanında törədilən terror aktında “türk, yaxud Orta Asiya faktoru” alət kimi istifadə edildi. 3. Ərdoğan Nazarbayevə təşəkkür etdi və əməkdaşlığı artırmaq təklifini irəli sürdü”.

Birinci məsələyə diqqət çəkən qazaxıstanlı siyasi ekspert deyib ki, Rusiya və Çin Türkiyənin Orta Asiya bazarına girməsini istəmir:

“Digər tərəfdən, Türkiyənin hazırda maraqlandığı bazar Orta Asiya yox, birbaşa Rusiya bazarıdır. Türkiyənin Rusiya, Qazaxıstan, Qırğızıstan, Özbəkistan arasındakı ticarət dövriyəsinin həcmi buna sübutdur. Rusiyanın yaratdığı Gömrük İttifaqının hədəflərindən biri də Türkiyəni bu coğrafiyadan uzaq tutmaqdır”.

N.Yusipbay Atatürk hava limanında törədilən terror aktında “türk, yaxud Orta Asiya faktoru”dan istifadə edildiyinə diqqət çəkərək, burada da Türkiyənin Orta Asiya ilə əlaqələrinə zərbə vurmaq məqsədinin olması ehtimalını yüksək dəyərləndirib.

“Bunlara baxmayaraq, Ərdoğan Nazarbayevlə münasibətləri daha da yaxşılaşdırmaq niyyətindədir. Əslində o, Putinlə də bunu etməyi düşünür. Lakin burada diqqətçəkən məqam terror aktında “türk faktoru”nun istifadə edilməsidir. Bu faktor bundan sonra da istifadə edilə bilər. Düşmən qüvvələr Orta Asiya ölkələrindən birində “türk faktoru”nu alət edərək, terror aktı törədə bilər. Bu dəfə İŞİD-də olan Türkiyə, yaxud Türkmənistan vətəndaşlarından istifadə oluna bilər. Bu ən qorxulu ssenari olar və Orta Asiyadakı qıpçaqlar və karluklarla oğuz türkləri arasında qarşıdurma yarana bilər. Buna görə də türklər birləşməli, Türkiyədəki AKP hökuməti də türk faktorunu ön plana çıxarmalıdır. Yoxsa hamımız üçün gec olar”, - deyə o vurğulayıb.