Dünya

Qadın hüquq müdafiəçisi sui-qəsdlə öldürüldü

26 İyun 2014 11:11

Liviyanın Binqazi şəhərində qadın hüquq müdafiəçisi məruz qaldığı sui-qəsd nəticəsində öldürülüb. ANS PRESS-in xəbərinə görə, Salva Buqaiş yaşadığı evdə hərbi geyimli naməlum şəxslərin silahlı hücumuna məruz qalıb. Buqaiş ağır yaralı vəziyyətdə Binqazi tibb məntəqəsinə çatdırılsa da onun həyatını xilas etmək mümkün olmayıb.

Hücum vaxtı hüquq müdafiəçisinin həyat yoldaşı evdə olsa da, daha sonra onun yoxa çıxdığı bildirilib.

Liviyada sui-qəsdlə öldürülən ilk qadın olan Buqaiş ötən gecə telekanallardan birində şahid qismində çıxış edərək Binqazidə baş vermiş insident barədə məlumat vermişdi.

Salva Buqaiş Qəddafi rejiminin devrilməsi ilə nəticələnən 2011-ci il inqlabında xüsusi fəallıq göstərmişdi.

ABŞ-ın bu ölkədəki səfiri Debora Cons tvitter sosial şəbəkəsindəki səhifəsində hücumu kəskin pisləyib:

“Cəsur qadın və həqiqi liviyalı vətənpərvərə qarşı qorxaq, aşağılıq, utancverici bir hərəkət!”