Dünya

Ukrayna komandası “Avroviziya” mükafatını satdı

30 May 2022 06:39

Builki “Avroviziya” beynəlxalq mahnı müsabiqəsində qalib gələn Ukraynanın “Kaluş Orkestri” qrupu kristal mikrofon mükafatını 900 min dollara satıb.

Publika.az xəbər verir ki, bu barədə qrup “İnstaqram”da məlumat yayıb.

Mükafat ukraynalı teleaparıcı və könüllü Sergey Pritulanın xeyriyyə fondu tərəfindən təşkil edilən hərraca çıxarılıb. Kristal mikrofonun alıcısı Ukrayna kriptovalyuta birjası olub.

Musiqiçilər bütün gəlirləri Ukrayna ordusuna bağışlamağı planlaşdırırlar. Satışdan əldə olunan vəsait Ukrayna Silahlı Qüvvələrinə veriləcək üç təyyarə və yerüstü idarəetmə stansiyasından ibarət pilotsuz uçuş aparatları kompleksinin alınmasına sərf olunacaq.

Musiqiçilər ianənin toplanmasına kömək edən hər kəsə öz minnətdarlığını bildirib.

Xatırladaq ki, qrup müsabiqədə taxdığı çəhrayı panamanı da hərraca çıxarmışdı. Onu 1000 qrivniyə (57 manat) Çexiyadan olan bir şəxs alıb.