Rusiyanın ukraynalılara zorla pasport paylamasının sirri: Britaniya kəşfiyyatı deyir ki...

İşğal altında olan ukraynalılara Rusiya pasportlarının məcburi şəkildə paylanması bu əraziləri Rusiyaya “bağlamaq” və işğalın iddia edilən uğurunu nümayiş etdirmək cəhdidir.

Publika.az xəbər verir ki, bu barədə Böyük Britaniya Müdafiə Nazirliyinin Ukraynadakı müharibə ilə bağlı kəşfiyyat icmalında deyilir.

Kəşfiyyat qeyd edir ki, işğalçı dövlət,demək olar ki, qalan ukraynalıları Rusiya pasportu almağa məcbur edir. Nümunə olaraq, onlar Xerson vilayətinin sakinləri üçün 2023-cü il iyunun 1-dən əvvəl Rusiya vətəndaşlığına razı olmadıqları təqdirdə deportasiya olunacaqları və əmlaklarının müsadirə ediləcəyi barədə bəyanatı göstərirlər.

“Rusiya pasportlarını işğal olunmuş ərazilərin "ruslaşdırılması" vasitəsi kimi istifadə edir – 2022-ci ildə yenidən genişmiqyaslı işğaldan əvvəl Donetsk və Luqansk bölgələrində olduğu kimi. Rusiya, çox güman ki, işğalı uğur kimi təqdim etmək üçün Ukraynanın işğal olunmuş ərazilərini Rusiya Federasiyasının bürokratik sisteminə inteqrasiya etməyə çalışır, xüsusən də 2024-cü il prezident seçkilərinin yaxınlaşması ilə”,- icmalda deyilir.

Aydan