Ostinin istefası Ukrayna üçün nə deməkdir? - ABŞ-dan AÇIQLAMA

Ukrayna üzrə Təmas Qrupu ABŞ-ın müdafiə naziri Lloyd Ostinin gözlənilən gedişindən sonra fəaliyyətini dayandıra bilər.

Publika.az xəbər verir ki, bu barədə “Politico” yazır.

Qeyd edilir ki, Ostin hazırda Almaniyadadır və burada Pentaqonun rəhbəri kimi müttəfiqləri ilə Ukraynaya dəstək üzrə son görüşündə iştirak edir. Qəzet yazır ki, onun gedişi Kiyev üçün ciddi zərbə olacaq.

Nəşr vurğulayır ki, qrup növbəti dəfə görüşəndə ​​vəziyyət tamamilə fərqli olacaq. Qrupun dağılması rus qoşunlarının irəliləməsi fonunda mövqelərini itirməkdə olan Ukraynaya mənfi təsir göstərə bilər:

"ABŞ-ın yeni seçilmiş prezidenti Donald Trampın andiçmə mərasimindən sonra Ostin Pentaqondan gedəcək və bununla da təmas qrupu baş təhrikçisini və qurucusunu itirəcək. Çünki heç bir başqa ölkə rəhbərliyi öz üzərinə götürməyi təklif etməyib”.

Bununla belə, NATO rəsmiləri deyirlər ki, qrup bir qədər dəyişdirilmiş formatda olsa da, Ostinsiz öz işini davam etdirə bilər. Alyans nümayəndələrindən biri qeyd edib ki, müttəfiqlərin ilk görüşlərinə ev sahibliyi edən Böyük Britaniya və Ukraynanın əsas təchizatçısı olan Almaniya qruplaşmanın potensial lideri ola bilər.

Adəm Abbaslı