Liviyadan Yunanıstana Türkiyə ilə bağlı reaksiya: Bizə əmr verə bilməzsiniz!

Liviya Nümayəndələr Palatası Yunanıstanın "Türkiyə ilə imzalanmış dəniz yurisdiksiyası memorandumunu ləğv etmək" çağırışlarına sərt reaksiya verib.

Publika.az xəbər verir ki, bu barədə Liviya Nümayəndələr Palatasının vitse-spikeri Misbah Duma bəyanat yayıb.

"Yunanıstan rəsmilərinin, xüsusən də spiker Nikitas Kaklamanisin son zamanlar Liviyanın daxili işlərinə qarışmaq və onun milli suverenliyini açıq şəkildə pozmaq üçün etdiyi təkrarlanan çağırışlar təəccüb və kədərlə qarşılanır. Dövlət tərəfindən bağlanan müqavilələr beynəlxalq hüquq və normalara tabe olan suveren qərarlardır və heç bir ölkənin Liviyaya onları təsdiqləməyi və ya ləğv etməyi əmr etmək hüququ yoxdur. Yunanıstanı Liviyanın suverenliyinə hörmət etməyə və Liviyanın daxili işlərinə müdaxilə cəhdlərini dayandırmağa çağırırıq", - bəyanatda vurğulanıb.

Qeyd edək ki, Yunanıstan Parlamentinin sədri Nikitas Kaklamanis Liviya Nümayəndələr Palatasını Türkiyə ilə Liviya arasında dəniz yurisdiksiyası ərazilərinin demarkasiyası ilə bağlı 2019-cu ildə imzalanmış memorandumu ləğv etməyə çağırıb.

Roza