Hindistan üç neft tankerini ələ keçirdi

Hindistan Sahil Mühafizəsi açıq dənizdə həyata keçirdiyi əməliyyat zamanı beynəlxalq neft qaçaqmalçılığı şəbəkəsinin fəaliyyətinin qarşısını alaraq üç neft tankerini saxlayıb.

Publika.az xəbər verir ki, bu barədə "Times of India" qəzeti Hindistan Sahil Mühafizəsinə istinadla məlumat yayıb.

Bildirilib ki, söhbət neftin qanunsuz daşınmasına görə ABŞ-ın sanksiyaları altında olan gəmilərdən gedir.

Məlumata əsasən, cinayətkar qrup "sahilyanı dövlətlərə rüsum ödəməkdən yayınaraq, münaqişə zonalarından ucuz nefti tankerlərə daşımaq üçün beynəlxalq sularda neftin bir gəmidən digərinə boşaldılması (aşırılması) üsulundan istifadə edib". Saxlanılan gəmilər növbəti yoxlamaların aparılması və işin hüquq-mühafizə orqanlarına təhvil verilməsi üçün Mumbay limanına müşayiət olunub.

Ötən gün "Reuters" agentliyi xəbər vermişdi ki, Hindistanın neft emalı zavodları mart-aprel aylarında tədarük edilməsi nəzərdə tutulan Rusiya neftini almaqdan çəkinirlər. Nəşrdə bildirilir ki, Hindistan şirkətləri gələcəkdə də Rusiya nefti ilə bağlı sövdələşmələrdən qaçmağı planlaşdırırlar.

Agentliyin mənbələrinin bildirdiyinə görə, bu addım Nyu-Dehliyə ABŞ ilə ticarət sazişləri bağlamağa kömək etməlidir.

Hüseyn İbadlı