Çantasında İranla bağlı sənədlər var: Bu gün görüşürlər - Netanyahu Trampa nə deyəcək?

İsrail baş naziri Benyamin Netanyahu bu gün Vaşinqtonda ABŞ prezidenti Donald Trampla görüşəcək.

Publika.az xəbər verir ki, görüşün Bakı vaxtı ilə saat 20:00-da Ağ Evdə keçirilməsi planlaşdırılır.

Ekspertlər görüşü "ABŞ-İsrail xəttində İran strategiyasını formalaşdırmaq məqsədi daşıyan bir əlaqə" kimi təsvir edirlər. ABŞ administrasiyası İran danışıqlarında nüvə proqramı ilə məhdudlaşa biləcək bir razılaşmanı da əhatə edə biləcək diplomatik prosesə açıq olduğunu bildirsə də, İsrail bu mövqeyə ehtiyatla yanaşır.

İsrail mediası və diplomatik mənbələrə görə, Netanyahunun əsas məqsədi Vaşinqtonu İrana qarşı daha sərt mövqe tutmağa sövq etmək və mümkün razılaşmanın əhatə dairəsini genişləndirməkdir.

Vaşinqtona yola düşməzdən əvvəl verdiyi açıqlamada Netanyahu Trampa İranla danışıqlarla bağlı "prinsipləri" təqdim edəcəyini bildirib. "Mən prezidentə yalnız İsrail üçün deyil, həm də Yaxın Şərqdə sülh və təhlükəsizlik istəyən hər kəs üçün vacib olan danışıqlar prinsiplərini çatdıracağam", - deyə o qeyd edib.

"Jerusalem Post" qəzetinə danışan İsrail təhlükəsizlik mənbələri Netanyahunun xüsusilə İranın ballistik raket proqramının və regional silahlı qruplara dəstəyinin razılaşmaya daxil edilməsini istədiyini bildirib. Eyni mənbələrə görə, Təl-Əviv hesab edir ki, yalnız nüvə fəaliyyəti ilə məhdudlaşan bir razılaşma İranın hərbi imkanlarını məhdudlaşdırmaq üçün yetərli olmaz.

"The National" qəzetinə danışan regional ekspertlər də Netanyahunun ABŞ-ın İranla danışıqlarında hərbi variantın tamamilə istisna edilməməsini təmin etməyi hədəflədiyini qeyd edirlər. Qəzetdəki təhlillərdə İsrailin Vaşinqtonu öz təhlükəsizlik prioritetlərinə yaxınlaşdırmağa və bu kontekstdə ABŞ-ın İranla danışıqları uğursuz olarsa, hərbi variantın masada qalmasını təmin etməyə çalışdığı bildirilir.

Qeyd edək ki, Netanyahu, Trampın ötən il vəzifəyə başlamasından bəri yeddinci dəfədir ki, ABŞ-a səfər edir.

Roza