"Oreshnik" raketinin analoqu bu ölkədə uğurla sınaqdan keçirildi

Hindistan fərdi hədəfləmə başlıqları texnologiyası (MIRV) ilə təchiz olunmuş modernləşdirilmiş "Agni" raketinin uçuş sınaqlarını uğurla həyata keçirib. Bu raket "Oreshnik" raketinin analoqu hesab olunur.

Publika.az xəbər verir ki, bu barədə Hindistan Müdafiə Nazirliyi məlumat yayıb.

Sınaqlar ölkənin şərqindəki Odişa ştatının sahillərində baş tutub. Raket Hind okeanı akvatoriyasında müxtəlif obyektlərə yönəldilmiş bir neçə döyüş bloku daşıyıb. Hindistanın hərbi idarəsindən qeyd edilib ki, MIRV texnologiyası bir raketə eyni vaxtda bir neçə döyüş başlığını müxtəlif hədəflərə çatdırmaq imkanı verir.

Nazirlik rəhbəri Racnat Sinqx ölkənin silahlı qüvvələrini sınaqların uğurla keçməsi münasibətilə təbrik edib.

Ötən il Hindistan ilk dəfə olaraq mobil dəmir yolu qurğusundan "Agni-Prime" orta mənzilli ballistik raketini buraxmışdı. Ölkənin Müdafiə Nazirliyinin məlumatında bildirilir ki, yeni nəsil raket 2000 kilometrə qədər məsafədəki hədəfləri vurmaq üçün nəzərdə tutulub və müxtəlif qabaqcıl funksiyalarla təchiz edilib.

Nazirlikdən bunun mükəmməl bir çəkindirici faktor ola biləcəyi vurğulanıb.

Hüseyn İbadlı