Bədəndə qəfil dəyişikliklər: Bu iki yaş dövrünə xüsusi diqqət yetirin

İnsan bədəninin müəyyən yaş dövrlərində qəfil bioloji dəyişikliklər yaşadığı müəyyən edilib.

Publika.az xəbər verir ki, bu nəticə Stanford Universitetində aparılan tədqiqat zamanı ortaya çıxıb.

Tədqiqatın rəhbəri, alim Maykl Snaider bildirib ki, insan orqanizmi həyat boyu iki əsas dəyişiklik mərhələsindən keçir. Bu mərhələlər təxminən 44 və 60 yaşlara təsadüf edir.

Araşdırmaya görə, həmin dövrlərdə bədəndə “ani sıçrayışlar” baş verir və hüceyrə quruluşundan tutmuş metabolizmə qədər bir çox sistem eyni vaxtda dəyişir.

108 nəfər üzərində aparılan uzunmüddətli müşahidələr zamanı 135 mindən çox bioloji göstərici analiz edilib. Nəticələr göstərib ki, Alzheimer və ürək-damar xəstəlikləri kimi risklər də məhz bu yaşlardan sonra kəskin şəkildə artır.

Xüsusilə 44 yaş ətrafında yağ, alkoqol və kofein metabolizmasında ciddi dəyişikliklər qeydə alınıb. 60 yaşdan sonra isə immun sistemi, böyrək funksiyaları və karbohidrat mübadiləsində daha güclü zəifləmə müşahidə olunur.

Alimlərin fikrincə, bu nəticələr qocalmanın xətti deyil, mərhələli və bioloji keçidlərlə baş verən bir proses olduğunu göstərir.

Müəllif: Roza