Hörmüz boğazı bu şərtlə açıq qalacaq - İranlı səfir

Hörmüz boğazı İran və Oman tərəfindən müəyyən ediləcək yeni şərtlər əsasında açıq qalacaq.

Publika.az xəbər verir ki, bunu İranın Moskvadakı səfiri Kazım Cəlali “İzvestiya”qəzetinə müsahibəsində bildirib.

Onun sözlərinə görə, ABŞ və İsrailin İrana qarşı apardığı müharibə boğaz vasitəsilə neft axınını böyük ölçüdə məhdudlaşdırıb.

“Münaqişədən əvvəl dünya neftinin təxminən beşdə biri bu boğazdan keçirdi. Son vaxtlar bir neçə tanker Fars körfəzini tərk edə bilsə də, neft və mayeləşdirilmiş təbii qazın (LNG) daşınması hələ də ciddi şəkildə məhdudlaşır. Əlbəttə, bu boğaz açıq olacaq, lakin İran və Oman hakimiyyət orqanlarının müəyyən edəcəyi yeni şərtlərlə. İran və Oman bu boğazla bağlı müəyyən xidmətlər göstərirlər. Və həmin xidmətlərə görə ödənişlər alınacaq”, - deyə Cəlali bildirib.

Səfir bu ödənişlərin detalları barədə əlavə məlumat verməyib.

Qeyd olunub ki, İranın mövqeyinə görə, daimi sülh sazişi əldə olunacağı təqdirdə, ölkə boğazdan keçən gəmilərdən rüsum tələb etmək hüququna malik olmalıdır. Bu rüsumun məbləği gəminin növündən, daşıdığı yükdən və mövcud şəraitdən asılı olaraq dəyişə bilər. Bu mövqe isə ABŞ prezidenti Donald Tramp tərəfindən qəti şəkildə rədd edilir.

Müəllif: Roza