İnqilabi texnologiya: 2 milyard insan bu bəladan qurtulur

Norveçin "Flocean" şirkəti dənizin təbii təzyiqindən istifadə etməklə dəniz suyunu içməli suya çevirən yeni təmizləmə sistemini istifadəyə verir.

Publika.az xəbər verir ki, bu barədə “Time” jurnalı məlumat yayıb.

Bildirilib ki, yeni texnologiya ənənəvi su təmizləmə üsulları ilə müqayisədə enerji sərfiyyatını 50 faizə qədər azaldır.

Sistem dənizin 400-600 metr dərinliyində yerləşdirilir və təxminən 50 bar təbii su təzyiqi filtrasiya üçün lazım olan enerjini təmin edir. Bundan əlavə, dərin dəniz suyunun daha təmiz olması kimyəvi maddələrdən istifadəni də 60 faiz azaldır. Təmizlənmə nəticəsində yaranan duzlu su isə dərin dəniz axınları vasitəsilə ekosistemə zərər vermədən yayılır.

Məlumata görə, sistemin hər modulu gündə 5 min kubmetr şirin su istehsal edir və təxminən 37 min 500 nəfərin gündəlik su tələbatını ödəyə bilir.

Mütəxəssislər hesab edirlər ki, bu texnologiya qlobal miqyasda tətbiq olunarsa, təmiz içməli suya çıxışı olmayan təxminən 2 milyard insan üçün uzunmüddətli və davamlı həll ola bilər.

Müəllif: Roza