Çexiya “Ağ aslan”ı Zelenskidən ala bilməz - Səbəb bəllidir

Çexiya Prezidenti Petr Pavelin administrasiyası “Azadlıq” və “Birbaşa Demokratiya” (SPD) partiyasının Ukrayna Prezidenti Volodimir Zelenskinin ölkənin ən yüksək dövlət mükafatı olan “Ağ aslan” ordenindən məhrum edilməsi təşəbbüsünü rədd edib.

Publika.az xəbər verir ki, administrasiya bildirib ki, nə konstitusiya, nə də qanun "Respublika Prezidentinə dövlət mükafatlarının ləğvi barədə qərar vermək səlahiyyəti vermir".

Bu barədə Çexiya prezidentinin mətbuat katibi “Ukrinform”a şərh verib:

"Respublika Prezidenti tərəfindən verilən və ya təqdim edilən dövlət mükafatı yalnız fəxri adlardan və mükafatlardan məhrum etmə cəzasını nəzərdə tutan məhkəmənin qanuni qərarı əsasında ləğv edilə bilər. Bu cəza yalnız Cinayət Məcəlləsində nəzərdə tutulmuş şərtlər daxilində tətbiq edilə bilər".

Zelenski "Ağ aslan" ordenini 2022-ci ilin oktyabrında Çexiya prezidenti Miloş Zemandan alıb. Zeman mükafatın əsas səbəbi kimi "Zelenskinin Amerikanın sığınacaq təklifini rədd etməsində və 2022-ci ilin fevral ayında Rusiyanın Ukraynaya müdaxiləsi başladıqdan sonra Kiyevdə qalmaq qərarı ilə bağlı" göstərmişdi.

Müəllif: Tural