Almaniyadan vətəndaşlarına Rusiya ilə bağlı çağırış: Ölkəni tərk edin

Almaniya Xarici İşlər Nazirliyi ölkə vətəndaşlarına Rusiyaya səfərlərdən çəkinməyi, hazırda Rusiya ərazisində olan almanlara isə yüksək ehtiyat tədbirləri görərək ölkəni tərk etmə imkanını nəzərdən keçirməyi tövsiyə edib.

Publika.az xəbər verir ki, bu barədə Almaniya XİN-in mətbuat xidməti məlumat yayıb.

Bildirilib ki, Moskva, Sankt-Peterburq, Leninqrad vilayəti və Rusiyanın digər bölgələri son vaxtlar daha tez-tez pilotsuz uçuş aparatlarının hücumlarına məruz qalır. Nazirliyin qiymətləndirməsinə görə, bu vəziyyət təhlükəsizlik risklərini artırmaqla yanaşı, hava limanlarında reyslərin kütləvi ləğvi və gecikmələrə səbəb olur.

XİN həmçinin Rusiyanın bəzi regionlarında yanacaq təchizatında fasilələr barədə məlumatlara diqqət çəkib. Almaniya vətəndaşlarına internet, VPN xidmətləri və bəzi sosial şəbəkələrin fəaliyyətində məhdudiyyətlərin yarana biləcəyi barədə xəbərdarlıq edilib. Bundan əlavə, xaricdən Rusiyaya gətirilən SIM kartların ölkəyə girişdən sonra ilk 24 saat ərzində bloklana biləcəyi qeyd olunub.

Nazirlik Rusiyada beynəlxalq ödəniş sistemlərinə aid bank kartlarının, o cümlədən "Visa" və "Mastercard"ın işləmədiyini də xatırladıb. Bu səbəbdən bankomatlardan nağd vəsait çıxarmaq, tanış ödəniş tətbiqlərindən istifadə etmək və ya xaricdən Rusiyaya pul köçürmək mümkün olmaya bilər.

Hazırda Rusiyada olan Almaniya vətəndaşlarına ölkəni tərk etmək tövsiyə olunub. Xüsusilə Ukrayna ilə həmsərhəd regionlarda - Kursk, Bryansk, Belqorod, Rostov və Voronej vilayətlərində qalmağın daha yüksək risk daşıdığı vurğulanıb.

Qeyd edək ki, Qərb ölkələrinin xarici siyasət qurumları tərəfindən Rusiya ilə bağlı bu cür tövsiyələr son illərdə mütəmadi olaraq yenilənir. Almaniya XİN-in son açıqlaması isə xarici vətəndaşların qarşılaşa biləcəyi gündəlik və infrastruktur çətinliklərinin daha detallı şəkildə sadalanması ilə diqqət çəkib.

Adəm