Vaşinqtonun yeni kursu İsraili təşvişə saldı - Netanyahu üçün son şans

İsrail Trampın İran siyasətindən narahatdır – Netanyahu yenidən görüşə hazırlaşır

İsrail rəhbərliyi ABŞ-ın diqqətini Hörmüz boğazındakı vəziyyətə yönəltməsi fonunda İranın nüvə proqramı məsələsinin ikinci plana keçəcəyindən narahatdır.

Publika.az xəbər verir ki, bu barədə "Al-Monitor" portalı İsrail rəhbərliyindəki mənbələrə istinadən məlumat yayıb.

Son həftələr Vaşinqton İranın nüvə proqramı ilə bağlı məsələnin həllinə əvvəlki kimi maraq göstərmir. İsrailin Baş naziri Benyamin Netanyahu bu narahatlığını bir neçə dəfə ABŞ prezidenti Donald Trampa çatdırıb.

"Nəzərlər tamamilə Hörmüz boğazına yönəlib. Heç kim İranın nüvə proqramından danışmır. Bu, bizim üçün mümkün olan ən pis ssenaridir. Netanyahu Trampı dəfələrlə inandırmağa çalışdı, lakin nəticə əldə olunmadı", - deyə portalın həmsöhbətlərindən biri bildirib.

Qeyd edilib ki, Netanyahu iyulun 19-da Donald Trampla görüş keçirməyi planlaşdırır. Görüşdə o, ABŞ prezidentini diqqəti yenidən İranın nüvə və raket proqramlarına yönəltməyə çağıracaq.