Kipr problemi ilə bağlı razılıq əldə edildi: 5+1 formatı bərpa olunur

BMT-nin Baş katibi Antonio Quterreş Kiprə səfəri çərçivəsində Şimali Kipr Türk Respublikasının prezidenti Tufan Erhürman və Cənubi Kipr Rum Administrasiyasının lideri Nikos Xristodulidis ilə görüşüb.

Publika.az xəbər verir ki, bu barədə Türkiyə mətbuatı məlumat yayıb.

Görüşlərin yekununda Quterreş Kipr probleminin həlli məqsədilə Türkiyə, Yunanıstan və Böyük Britaniyanın da iştirakı ilə 5+1 formatında danışıqların yenidən keçiriləcəyini açıqlayıb. O bildirib ki, tərəflərin və zəmanətçi ölkələrin razılığı alınıb, hazırda görüşün təşkili üçün hazırlıq işləri aparılır.

Tufan Erhürman səfəri müsbət qiymətləndirərək bildirib ki, bu görüşlər BMT çərçivəsində iki tərəfin bərabər statusunun bir daha təsdiqlənməsi baxımından əhəmiyyətlidir. O vurğulayıb ki, məqsəd sadəcə danışıqlar aparmaq deyil, real nəticə əldə etməkdir.

Nikos Xristodulidis isə genişləndirilmiş görüşün uğurlu keçməsinin vacibliyini qeyd edərək danışıqların Krans-Montanada yarımçıq qaldığı nöqtədən davam etdirilməsinə çalışacaqlarını bildirib.

Türkiyə Xarici İşlər Nazirliyinin sözçüsü Öncü Keçeli isə bəyan edib ki, Kipr məsələsində köhnə həll modelləri artıq öz aktuallığını itirib. O, problemin yalnız Kipr türk xalqının suveren bərabərliyi və bərabər beynəlxalq statusu əsasında həll oluna biləcəyini vurğulayıb.

Müəllif: Roza