Talibandan ABŞ-a böyük təklif: 1 trilyon dollarlıq sərvətimiz var

Taliban ABŞ prezidenti Donald Tramp administrasiyasına Əfqanıstanın 1 trilyon dollardan çox dəyərindəki yeraltı mineral ehtiyatlarına investisiya təklif edib.

Publika.az xəbər verir ki, bu barədə Talibanın xarici işlər naziri Əmirxan Müttəqi “Financial Times”a açıqlamasında bildirib.

Müttəqi ABŞ ilə münasibətlərin 20 illik müharibə dövrü üzərindən deyil, gələcəkdə qurula biləcək əməkdaşlıq əsasında qiymətləndirilməsinin vacib olduğunu söyləyib. O, ABŞ şirkətlərinin mədənçilik, infrastruktur, kənd təsərrüfatı və ticarət sahələrinə investisiyalarını alqışlayacaqlarını bildirib.

Əfqanıstanda mis, dəmir filizi, kobalt, qızıl, litium və niobium kimi strateji əhəmiyyətli mineralların böyük ehtiyatlarının olduğu bildirilir. Lakin uzun illər davam edən müharibə və zəif infrastruktur səbəbindən bu sərvətlərin böyük hissəsi hələ də istismar edilə bilməyib.

Taliban bunun qarşılığında sanksiyaların aradan qaldırılmasını və xaricdə dondurulmuş Əfqanıstan aktivlərinin sərbəst buraxılmasını istəyir. Məlumata görə, ölkənin təxminən 9,5 milyard dollarlıq xarici ehtiyatı var ki, bunun da 7 milyard dollara yaxın hissəsi ABŞ-da dondurulub. Taliban həmçinin ABŞ-ın Kabildəki səfirliyini yenidən açmasını və Əfqanıstandakı diplomatik fəaliyyətini bərpa etməsini istəyir.

Taliban 2021-ci ildə hakimiyyətə qayıtdıqdan sonra Çin və İran da daxil olmaqla müxtəlif ölkələrlə 7 milyard dollardan çox mədənçilik sazişi elan edib. İndi isə Vaşinqtonu da bu prosesə cəlb etməyə çalışır.

Lakin ABŞ-Taliban münasibətlərində ciddi fikir ayrılıqları qalır. Tramp Əfqanıstandakı Bəqram aviabazasının ABŞ nəzarətinə qaytarılmasını gündəmə gətirib, Taliban isə bu tələbi rədd edib.

Bundan başqa, Talibanın qadın və qızların təhsil, əmək və ictimai həyatda iştirakına tətbiq etdiyi sərt məhdudiyyətlər Vaşinqtonla münasibətlərin normallaşması qarşısında əsas maneələrdən biri olaraq qalır.

Müəllif: Roza