Maaş çox, varlı yox - Səbəbi açıqlandı

Rusiyada gəlirlərin statistik olaraq artması əhalinin böyük hissəsinin maddi vəziyyətinin yaxşılaşması anlamına gəlməyə bilər.

Publika.az xəbər verir ki, iqtisadçı, Yeni Cəmiyyət İnstitutunun direktoru Vasili Koltaşov "Pravda.ru"ya açıqlamasında real gəlirlərin əhalinin müxtəlif qrupları üzrə qeyri-bərabər dəyişdiyini bildirib.

Onun sözlərinə görə, hazırda real gəlirlərin artımı əsasən rəsmi əmək müqaviləsi, sabit iş yeri və sosial paketə malik şəxslərdə müşahidə olunur. Bu qrupda artım 0,8 faiz təşkil edir.

İqtisadçı qeyd edib ki, özünüməşğul şəxslərin, mülki-hüquqi müqavilə ilə çalışanların və natamam iş rejimində işləyənlərin alıcılıq qabiliyyəti isə azalır. Koltaşov bu tendensiyanın 2025-2026-cı illərdə müşahidə edildiyini və qarşıdakı iki ildə də davam edə biləcəyini bildirib.

O, əməkhaqqının bir hissəsini qeyri-rəsmi alan şəxslərin də inflyasiya fonunda real gəlirlərinin azaldığını vurğulayıb.

Qeyd edək ki, Rusiyanın İqtisadi İnkişaf Nazirliyinin məlumatına görə, 2026-cı ilin yekununda ölkədə orta aylıq hesablanmış əməkhaqqının 112,3 min rubla (2 min 259 manat) çatacağı gözlənilir. Bu, əvvəlki ilin göstəricisindən 10 faiz çoxdur.

Müəllif: Adəm Abbaslı