Məşhur strimer marağının qurbanı oldu - Hasarda qalan qopmuş barmağı...

Tanınmış braziliyalı strimer, Lodk kimi tanınan Adalton Rodriges çəkiliş zamanı hasardan aşmağa çalışarkən barmağını itirib.

Publika.az xəbər verir ki, insidentin əks olunduğu video “X” sosial şəbəkəsində yayımlanıb.

Rodriges Rio-de-Janeyro şəhərində Rok şəhəri (Cidade do Rock) adlanan xüsusi meydançada keçirilən tanınmış “Rock in Rio” musiqi festivalını ziyarət etməyə hazırlaşırmış. Strimer tədbirə giriş üçün biletə sahib olub, lakin o, ərazinin nə qədər yaxşı qorunduğunu yoxlamaq üçün kompleksin ərazisinə dolayısı yolla daxil olmağı və hasardan aşmağı qərara alıb.

Hasardan aşarkən o, adsız barmağındakı üzüklə hasarın çıxıntısına ilişib və nəticədə barmağı ağır zədələnib. Rodriges baş verənləri dərhal anlamadığını bildirib. Hasarda qalan qopmuş barmağı strimerin dostu görüb.

“Mən əlimə baxdım, barmağın yerində yalnız sümük qalmışdı. Barmaq tamamilə qopmamışdı, lakin üzərindəki bütün dəri soyulmuşdu”, - deyə bloqer danışıb.

Bundan sonra o, xəstəxanaya çatdırılıb və orada zədələnmiş barmağı amputasiya edilib. Rodriges etiraf edib ki, etdiyi əməldən peşman olub.

Hüseyn İbadlı