Güclü günəş partlayışlarının sayı artdı

M sinfinə aid, yəni sondan əvvəlki kateqoriyaya daxil olan Günəş partlayışlarının sayı doqquza çatıb.

Publika.az xəbər verir ki, bu barədə Tətbiqi Geofizika İnstitutu (FGKU “İPG”) məlumat yayıb.

“Bakı vaxtı ilə 9 dekabr saat 12:05-də rentgen diapazonunda 4294 (S12W46) ləkə qrupunda 17 dəqiqə davam edən M1.2 sinifli alışma qeydə alınıb. Saat 19:14-də isə həmin 4294 (S13W52) qrupunda 32 dəqiqə davam edən M1.5 sinifli alışma müşahidə olunub”, — deyə məlumatda bildirilib.

Dekabrın 9-da institut günorta saatlarınadək Günəşdə M sinifinə aid yeddi alışmanın baş verdiyini açıqlamışdı.

Dekabrın 8-də isə Günəşdə 15 dəqiqə davam edən X sinfi üzrə güclü alışma qeydə alınmışdı.

Günəş alışması, Günəşdə burulmuş maqnit sahələrindəki enerjinin kəskin şəkildə sərbəst qalması ilə baş verən partlayışa deyilir. Bu zaman elektromaqnit spektrinin bütün diapazonlarında, o cümlədən radiodalğalar və qamma-şüaları daxil olmaqla güclü radiasiya axını yaranır. Günəş partlayışları rentgen şüalanmasının gücündən asılı olaraq A, B, C, M və ya X sinifləri ilə təsnif edilir. Ən güclü alışmalar Yerdə radio maneələrə səbəb ola və uzunmüddətli maqnit qasırğaları yarada bilər.

Hüseyn İbadlı