SON DƏQİQƏ: Azərbaycanda tədris ili uzadıldı - RƏSMİ

Azərbaycanın ali məktəblərində tədris ilinin müddəti 15 gün uzadılıb.

Bu barədə Təhsil nazirinin müavini Firudun Qurbanov əmr imzalayıb.

Belə ki, dərslər mayın 30-da deyil, iyunun 15-də bitəcək. İmtahanlar isə 15 iyunda başlayacaq və 13 iyulda başa çatacaq.

Buraxılış kursları istisna olmaqla digər tələbələrin dərsləri martın 27-də başlayacaq və mövcud akademik təqvimlə müəyyən edildiyi kimi mayın 30-dək deyil, iyunun 15-dək davam edəcək (15 gün - 2 həftə artırılır). Müvafiq olaraq imtahan sessiyasına mövcud akademik təqvimdə ayrılan həftələrin sayı 5 deyil, 4 həftə müəyyən edilib.

Ali təhsil müəssisələrinin sonuncu kurs tələbələrinin nəzəri təlim müddətinin başa çatdığını, onların hazırda təcrübədə olduğunu nəzərə alaraq müvafiq ixtisaslar üzrə sonuncu kursda təhsil alan tələbələrin (“Təhsil” ixtisasları qrupuna daxil olan ixtisaslar (pedoqoji ixtisaslar) üzrə təhsil alanlar istisna olmaqla) tədris qrafiki dəyişdirilmir. Yəni dövlət attestasiyasının keçirilməsi qrafikə uyğun iyun ayının sonuna qədər aparılacaq.

“Təhsil” ixtisasları qrupuna daxil olan ixtisaslar (pedoqoji ixtisaslar) üzrə tələbəlrin təcrübəsi (təcrübə orta ümumtəhsil məktəblərində aparıldığına və burada dərslər iyunun 14-ə qədər davam etdiyinə görə) iyunun ayının 15-nə qədər davam etdiriləcək və bu zaman dövlət attestasiyası iyunun 15-dən iyulun 13-nə qədər aparılacaq.

***

Azərbaycan Dövlət Neft və Sənaye Universiteti tədris ilini iyun ayınacan uzadıb.

Publika.az xəbər verir ki, bu barədə universitetin rəsmi saytında məlumat dərc olunub.

Məlumatda deyilir ki, Azərbaycan Respublikası Nazirlər Kabinetinin Sərəncamına əsasən, koronovirus xəstəliyinin yayılmasının və yoluxma hallarının qarşısının alınması, vəziyyətin nəzarətdə saxlanılması və ölkə ərazisində yerləşən bütün təhsil müəssisələrində tibbi-profilaktik, dezinfeksiyaedici və digər qabaqlayıcı tədbirlərin davam etdirilməsi məqsədilə 2020-ci ilin mart ayının 10-dan 20-dək bütün təhsil müəssisələrində tədris, təlim-tərbiyə prosesi dayandırılıb və bununla bağlı bütün tədbirlər təxirə salınıb.

Qeyd olunanları nəzərə alaraq və təhsil proqramlarının icrasını təmin etmək məqsədilə Azərbaycan Respublikası Təhsil Nazirliyi tərəfindən ali təhsil müəssisələrinin rəhbərlərinə 11.03.2020-ci il tarixli, 03-03-436/15 nömrəli məktub ünvanlanıb.

Məktuba əsasən bildiririk ki:

Buraxılış kursları istisna olmaqla digər tələbələrin dərsləri mart ayının 27-də başlayacaq və mövcud akademik təqvimlə müəyyən edildiyi kimi mayın 30-dək deyil, iyunun 15-dək davam etdiriləcəkdir. Müvafiq olaraq imtahan sessiyasına ayrılan həftələrin sayı 5 deyil, 4 həftə müəyyən edilir və 15 iyun – 13 iyul tarixlərində keçiriləcək.

Sonuncu kurs tələbələrinin nəzəri təlim müdətinin başa çatdığını, onların hazırda təcrübədə olduğunu nəzərə alaraq müvafiq ixtisaslar üzrə sonuncu kursda təhsil alan tələbələrin tədris qrafiki dəyişmir, yəni dövlət attestasiyasının keçirilməsi iyun ayının sonuna qədər aparılacaqdır.