Şagirdi FİZİKİ və PSİXOLOJİ YÜKDƏN necə qurtaraq? - ŞƏRH
Bizi izləyin

Elm və təhsil

Şagirdi FİZİKİ və PSİXOLOJİ YÜKDƏN necə qurtaraq? - ŞƏRH

“Məktəblərdə dərs yükünün çoxluğu şagirdin məktəbə qarşı motivasiyasına və dərsə hazırlığına mənfi təsir edir. Eyni zamanda, onun fənni mənimsəməsinə, akademik səviyyəsinin aşağı düşməsinə səbəb olur”.

Bu barədə Publika.az-a danışan uşaq psixoloqu Gülnar Həmidova hesab edir ki, əgər şagird məktəbə hazırlıqlı gələrsə, dərs yükünü hiss etməyəcək.

Onun sözlərinə görə, məktəblərin bir problemi də dərs cədvəllərinin hazırlanması ilə bağlıdır:

“Əgər cədvəl düzgün tərtib olunarsa, şagird yükü o qədər hiss etməyəcək. Ancaq bu gün cədvəl düzgün hazırlanmır və bir fənn ardıcıl iki dəfə salınır. Hər fənnin arasına idman, musiqi və rəsm dərsləri salınmadığı üçün şagird həm zehni, həm psixoloji cəhətdən tez yorulur, həm də məktəbdən sıxılmağa başlayır. Halbuki, bu dərslər onlar üçün maraqlı və rahat olmalıdır. Yalnız yuxarı siniflərdə standart tədris sistemi tətbiq olunur. Bu siniflərdə də cədvəl düzgün hazırlanarsa, şagirdlər əziyyət çəkməzlər”.

Ekspert son illər fərqli dərslik proqramlarından da istifadə olunduğunu bildirdi:

“Bir müddət əvvəl bu proqramların çox ağır və çətin olması ilə bağlı fikirlər səsləndirildi. Əslində isə belə deyil və dərslikdə hafizənin, təfəkkürün və diqqətin inkişafı üçün vacib materiallar, eləcə də dərslərin şagirdlərə oyun şəklində keçilməsi ilə bağlı yaxşı mövzular var. İlk vaxtlar müəllimlər buna hazır deyildilər, amma sonrakı dövrlərdə təlimlər keçirildiyi üçün proqramı tam mənimsədilər. Hərflər uşaqlara oyun vasitəsilə öyrədilir və dərs uşağın yaddaşına daha tez həkk olunur. Bu dərsliklər pilot layihə kimi 2-3 il əvvəldən hazırlanır. Yeni tədris ilində isə dördüncü siniflər üçün çap olunacaq”.

Qeyd edək ki, artıq bir neçə ildir bütün məktəblərdə psixoloqlar fəaliyyət göstərir. Amma cəmiyyətdə səslənən fikirlər və edilən şikayətlər göstərir ki, onların bir çoxu şagirdlərlə işləmirlər. Əgər düzgün işləsələr, şagirdlərin fənni qavramasında, psixoloji cəhətdən dərsə hazırlığında heç bir problem olmaz.

Bu fikirlərə münasibətini açıqlayan müsahibimiz, məktəblərdə psixoloq ştatının əsasən 2021-ci ildə məktəblərdə psixoloq ştatlarının sayı artdı:

“Ondan əvvəl hər məktəbdə bir psixoloq vardı. Aprel ayından isə artıq 2-3 psixoloq ştatı açıldı. Psixoloqlar dövlət imtahanı xətti işə qəbul olundular və məktəblərə göndərildilər. Artıq hər məktəbdə iki psixoloq fəaliyyət göstərir. Onların düzgün işləyib-işləməməsi isə vicdanları və peşəkarlıqları ilə bağlı bir məsələdir. Əgər psixoloq öz vəzifəsinə vicdanla və məsuliyyətlə yanaşarsa, məktəbdə heç bir problem yaşanmaz. Əgər psixoloq məktəbdə cədvəlin hazırlanmasına cəlb olunarsa, həm şagirdlər yorulmayacaq, həm də düzgün istiqamətləndirəcəklər”.

Rövşən Ziya

Oxumağa davam et
Reklam
Reklam

Gündəm