Qiymət artımını bu səbəblər şərtləndirdi - İlham Şaban

“Tarif Şurası Aİ-92 markalı avtomobil benzininin və dizelin artım səbəblərini göstərib. Benzinin qiymətinin artırılmasının əsas səbəbi keyfiyyətin yaxşılaşdırılması, Heydər Əliyev adına Neft Emalı Zavodunun modernləşdirilməsi faktorlarıdır”.

Bu fikirləri Publika.az-a danışan Neft Araşdırmaları Mərkəzinin rəhbəri, ekspert İlham Şaban deyib.

O bildirib ki, əsas səbəblərdən biri də bu məhsulların keyfiyyətinin yüksək avrostandartlara çatdırılmasıdır: “Dizelin qiymətinin artırılması isə əsasən ekoloji faktorlarla əlaqələndirilir. Ekoloji mühitin yaxşılaşdırılması burada mühüm rol oynayır. Dizel yanacağından istifadənin ekoloji zərərləri nəzərə alınaraq daha çox benzin istehlakına keçilməsi məqsədilə hər iki məhsul arasında qiymət fərqi azaldılıb. Dizelin qiymətinin artımı sanki istehlakçıları dizellə işləyən minik avtomobillərindən benzin avtomobillərinə keçidə bir təşviq forması olub. Qiymət artımını qeyd edilənlər şərtləndirib. Düşünürəm ki, başqa bazar iqtisadiyyatlı ölkələrdə olduğu kimi dizellə benzinin qiymətinin eyni olacağı halda bu, effektli olardı. Belə olan təqdirdə insanlarda benzinlə işləyən avtomobillərə keçid üçün meyl yaranar”.

Akqabay Mıradov