Hadisə

Türkiyədə itkin düşən azərbaycanlı tələbə ölü tapıldı - FOTO

10 Sentyabr 2021 10:33

Türkiyədə təhsil alan azərbaycanlı tələbə tikinti sahəsində asılı vəziyyətdə tapılıb.

Publika.az xəbər verir ki, İzmir Buca Atatürk Liseyinin 2-ci kurs tələbəsi Ümit Can Özden 2 il öncə Azərbaycandan Türkiyəyə köçüb.

16 yaşlı gənc qohumlarını ziyarət etmək üçün ötən həftə Mardinin Kızıltepe qəsəbəsinə gedib. O, sentyabrın 3-də restoranda nahar etmək adı ilə çıxıb və bir daha geri qayıtmayıb.

2005-ci il təvəllüdlü yeniyetmə Tepebaşı məhəlləsinin Urfa küçəsi Cümhuriyyət meydanında iş yerlərinin birinin kameralarına yansıyıb. Türkiyə hüquq-mühafizə orqanları əməkdaşlarının apardığı əməliyyat-axtarış tədbirləri nəticəsində Ümit Can Özden sentyabrın 9-da səhər saatlarında Kızıltepe yaxınlığındakı tikinti sahəsində asılmış vəziyyətdə tapılıb. O, tibbi ekspertiza üçün Mardin Dövlət Xəstəxanasına aparılıb.

Yeniyetmənin cənazəsi bu gün səhər saatlarında Bakıya gətirilib.