Ötən gün ölkədə 17 yanğın olub

Azərbaycan Respublikasının Fövqəladə Hallar Nazirliyi üzərinə düşən vəzifələrin icrası, o cümlədən əhalinin və ərazilərin təbii və texnogen xarakterli fövqəladə hallardan qorunması istiqamətində fəaliyyətini davam etdirir.

Publika.az xəbər verir ki, Fövqəladə Hallar Nazirliyinin “112” qaynar telefon xəttinə daxil olmuş zənglər əsasında Nazirliyin aidiyyəti qurumları tərəfindən ötən sutka ərzində 17 yanğına çıxış və 5 köməksiz vəziyyətdə qalma faktı üzrə qəza-xilasetmə əməliyyatları həyata keçirilib.

Həmçinin, gecə saatlarından başlayaraq respublikanın cənub bölgəsinə intensiv yağan yağıntıların törətdiyi fəsadların aradan qaldırılması üçün dərhal Nazirliyin müvafiq qüvvə və texnikaları Masallı rayonunun Mollaoba, Bədəlan, Təzə Alvadı kəndlərində, Cəlilabad şəhəri və rayonunun Bəcirəvan kəndində xilasetmə, suçəkmə və digər təxirəsalınmaz təcili tədbirlərin həyata keçirilməsinə cəlb olunub. Görülmüş təcili və təxirəsalınmaz tədbirlər nəticəsində yanğınların operativ söndürülməsi, insanların həyatının xilas olunması təmin edilib.

Ümumilikdə, FHN-in qüvvələri tərəfindən ötən sutka ərzində 1-i azyaşlı olmaqla 11 nəfər, o cümlədən Şabran rayonunun Çuxurazəmi kəndində “ВАЗ” markalı minik avtomobilinin qarda batması nəticəsində nəqliyyat vasitəsində köməksiz vəziyyətdə qalmış 4 nəfər xilas edilib.

Həmçinin, cənub bölgəsinə yağan intensiv yağışlar nəticəsində subasmaya məruz qalmış Cəlilabad və Masallı rayonlarının yaşayış məntəqələrində ümumilikdə 39 nəfər təhlükəsiz əraziyə təxliyə olunub.